Desde e aña pasa den e luna di februari e virus Zika ta circulando. Tin casi un aña cu ta monitor e virus aki. Te cu awor no tin casonan confirma di e virus aki na Aruba, pero tin shete (7) caso sospechoso. Sra. Maribel Tromp hefe di seccion di Epidemiologia di departamento di Salud Publico a splica mas riba esaki.
Departamento di Salud Publico ta monitor e situacion di e virus mundialmente. Desde aña pasa na november e virus a yega mas cerca di e region di Aruba. Actualmente e virus Zika a plama den paisnan Latino America, Centro America, Merca, incluso den islanan di e region Caribe, Sra. Tromp a indica. Pero te cu na e momentonan aki, aki na Aruba no a haya casonan confirma di e virus.
Casonan sospechoso
Loke si departamento di Salud Publico a haya ta notificacion di casonan sospechoso di e virus Zika. Desde aña pasa na november te cu awor tin 7 caso sospechoso. Tres di e casonan aki a sali negativo, mientras cu e otro cuater ta pendiente pa e testnan. Pa por haya e resultadonan, e testnan ta wordo manda pa Hulanda pa asina nan por wordo haci. Ta manda e testnan afo pasobra aki na Aruba ainda no tin e capacidad pa haci e testnan aki. “Locual si nos ta kere ta cu mirando e manera leve cu Zika ta presenta su mes den sintomanan, no tin duda cu kisas nos por tin e. Pero esey mi no ta kere cu nos por confirma esey,” el a bisa.
Virus por pasa di mama pa feto
E diferencia grandi entre Zika y Dengue of Chikungunya ta cu esaki ta bin den un manera leve. Por ehempel den 5 hende, uno lo presenta e cantidad di casonan aki. Locual tambe nan ta raporta na Sra. Tromp ta cu ta haciendo investigacion riba e parti di kico por ocasiona cerca babynan recien naci e parti di micorsefali, pero esaki no ta proba ainda. Investigacion ta wordo haci riba e parti aki. Pero loke si a wordo confirma siman pasa ta cu un mama cu tin un feto, e virus por pasa di e mama pa e yiu. E consecuencianan di esaki no ta ful cla ainda.
Reenforsa informacionnan di Zika
Loke cu departamento Salud Publico ta haciendo desde aña pasa den e luna di december ta reenforsa e informacion riba Zika. “Nos tabata manteniendo eigenlijk pa manda testnan afo. Nos tabata tin un caso definitie, manera nos ta yam’e cu bo mester tabata tin un historia cu bo a biaha na cierto pais cu ta infecta,” segun Sra. Tromp. “Januari a habri mirando e situacion cu el a plama den ful region, nos a dicidi kita e parti di historia cu bo a biaha. Nos ta manda e test na e cuadro clinico cu ta pas cu zika. E laboratorio ta manda e test afo.” Esaki ta un cambio cu e departamento a haci mirando e situacion.
