ESTADONAN UNI (The Verge) – Inteligencia Artificial ta un di e terminonan mas mal uza den tecnologia awendia, y un estudio nobo aparentemente ta confirma con exagera e termino a bira.
Segun un encuesta di e compania di Londres MMC, 40 porciento di compania ‘startup’ Europeo cu ta clasifica como compania di Inteligencia Artificial (AI) no ta uza AI den ningun manera cu ta ‘material’ pa nan negoshi. MMC a studia como 2,830 startup den 13 pais di Union Europeo pa yega na su conclusion, revisando e ‘actividadnan, enfoke y fondo’ di cada compania.
“Den cuarenta porciento di e casonan nos no por a haya evidencia di AI”, hefe di investigacion di MMC, David Kelnar, kende a compila e reporte, a bisa Forbes. Kelnar a bisa cu esaki ta nifica cu ‘companianan cu hende ta asumi y pensa cu ta compania di AI, probablemente no ta.”
Manera Forbes a nota, e declaracion cu e startupnan aki ta ‘compania di AI’ no necesariamente ta bin di e companianan mes. Website terceros di analisis hopi biaha ta responsabel pa e clasificacion, y no a sali na cla for di e reporte di MMC cuanto AI startup falso tabata activamente gañando nan cliente.
Pero e hallazgo di e reporte ta mustra cu tin incentivonan obvio pa companianan no bisa nada si nan wordo clasifica malo. E termino ‘inteligencia artificial’ evidentemente ta un droga pa inversionistanan, y MMC a haya cu startupnan cu ta bisa cu ta traha den AI ta haya entre 15 pa 50 porciento mas fondo compara cu otro companianan.
Kelnar a bisa Forbes: “Mi por pensa den mayoria di caso, [e startupnan] lo ta na altura di con nan ta wordo clasifica.” Nan djis no kier coregi e eror.
E reporte di MMC a haya cu ora companianan ta lansa inteligencia artificial y aprendisahe di mashin, e casonan di uzo hopi biaha ta trivial. Algun di e formanan mas popular cu e startupnan ta uza AI ta inclui ‘chatbots’ (26% di compania) y deteccion di fraude (21 porciento). Den tur dos caso, ta dificil pa husga exactamente cuanto di e tecnologia aki ta beneficia e clientenan. Chatbots hopi biaha ta fastioso pa nabega y por ta simplemente un forma pa evita e costo di un humano den servicio di cliente. Y mientras deteccion di fraude ta bon pa usuarionan y negoshinan, e ta mas un servicio auxiliar cu un punto di benta.
Pero, manera nos a siña cu e proliferacion di aparatonan manera skeiro di djente AI, djis paso algo ta bisa AI, no kiermen cu e ta, ni tampoco cu e ta importante. Inteligencia artificial ta un termino cu ta abarca un categoria amplio di tecnologia, y aparentemente, di exageracion.
