Cuanto por haci… Cu 30 miyon extra…?

Por bisa cu e critica riba gobierno pa malgasta placa cu pueblo ta pone, pa paga Hulanda na interes extra, no tabatin realmente e resonancia politico cu por a spera. Parcialmente esey tin su splicacion den e aparente union ‘tactico’ entre e rivalnan grandi tradicional, cu den e asunto aki tin interes comun pa atende. Manera splica den anterior edicion di Editorial, esey ta e conservacion di e ley local di supervision financiero, cu proximamente lo ser trata den parlamento.

Na nivel di otro autoridadnan cu por y realmente mester duna nan vision den esaki, nos por a observa e comentario cu presidente di Banco Central di Aruba a duna den cuadro di e InterExpo 2023, celebra recientemente, expresando su desapunto pa e hecho cu gobierno a opta pa e version mas caro di acuerdo cu Hulanda pa e repago di e prestamonan, tardando demasiado cu yega na un acuerdo tocante e ley di Reino cu Hulanda ta desea. Y e tardanza ey ta parce serio, si ta berdad loke gobierno ta skirbi den e contesta di gobierno (Nader Rapport) riba conseho di Raad van Advies (RvA), unda ta bisa cu a opta pa un cambio di ley y no pa un prolongacion di e protocol di november 2018, pa duna mayor claridad y seguridad legal, specificamente pa loke ta e normanan di presupuesto. “Tin na e momento aki un diferencia di opinion entre Aruba y Hulanda tocante e forma y contenido exacto di e supervision presupuestario. Anticipando un solucion satisfactorio pa ambos pais nan ta desea en todo caso completa e LAft cu e normanan di presupuesto cu lo ta vigente desde 1 di januari 2024 te na e momento cu lo alcanza un solucion satisfactorio,” gobierno di Aruba ta declara. Fecha di e ponencia aki: 28 di november 2023. Pa bon comprension: un trayecto cu a cuminza tempran den 2020, casi tres aña despues ainda ta pega riba “diferencia di opinion encuanto forma y contenido di e supervision”. Esey practicamente ta haci nos perde speranza cu den e proximo añanan lo tin un acuerdo, mucho menos un ley di Reino. Di manera cu nos tin nos dilanti sigur varios aña di pago di interes na e nivel mas halto, cu e perspectiva cu e por ta pa 20 aña, si ta keda insisti di no kier un ley di Reino. Esaki lo bay costa nos na 2024, como 30 miyon florin y riba henter e trayecto, entre 667 y 934 miyon florin, dependiendo di e interes exacto, segun RvA. Tur esaki nos por a usa pa alivia otro problema urgente.

Kico asina bo por haci cu 30 miyon florin? En todo caso no emplea mas amigo y famia, a costo di cien mil florin pa aña, pa cabez, cu ta e costo promedio di cada empleo fulltime den gobernacion. E ruta ey felizmente ta cera, a base di e propio acuerdo y supervision di cual gobierno ta bisa cu nan ta apoya. Loke tampoco mester duna prioridad ta e intentonan, te awe patetico, pa yega na ‘diversificacion di economia’. Nos tin sigur cuarenta aña ta tende e storia ey pero nunca a mira plan exitoso riba e tereno aki. Den esey nos no ta nos so; nos ta parti di un region cu afanosamente ta pa decadas en busca di e diversificacion ey y mayoria di nan a opta pa copia nos exito den turismo…

Kico si anto? Por ehemplo, mehora structuralmente atencion na e ciudadania den problema social y economico serio. Seguidamente, atencion pa e creciente problema di e ciudadano di edad mayor. Pa un parti importante, e dos gruponan aki ta comparti e mesun problemanan. Nos no tin solamente e problemanan financiero grandi pa esnan cu no ta haya suficiente salario pa cera luna, sino tambe e creciente grupo di hende di edad cu tin solamente un AOV parcial, entre nan e grupo grandi cu a yega na nos pais na un edad mas adulto caba y cu no por sobrevivi awor ariba un pension di par di cien florin. Esaki ta e problemanan señala hopi aña pasa caba pa empleado publico cu tabata comprende nan trabao y tabata adverti e diferente mandatarionan, cu supuestamente, hunto cu nan famia y amigonan, tabata ‘sa mihor’. Na esun cu t’ey awor e tarea di enfrenta e problemanan aki a largo plazo. Den un edicion na october Bon Dia Aruba a duna relato di e propuesta di e actual Mediador di Gobierno, na e Foro Nacional tocante Adulto Mayor, pa crea un fondo pa por atende e problemanan cu ta surgi cu e grupo considerable cu ya ta bay na casi un cuarta parti di nos poblacion. Di acuerdo cu su ponencia, a sabiendas cu tin awor caba riba 22.000 persona cu AOV. Anto bo no por tin algun cien cupo so di espacio pa anciano cu no por biba riba nan mes mas. Nos por ‘disfruta’ regularmente di e noticianan tocante diferencia di opinion entre gobierno y fundacion specializa, mas tanto tocante finanzas, pero no ta trata solamente di bon maneho, y supervision adecua, sino e futuro tarea mas amplio cu nos tin nos dilanti como comunidad. Tene un seminario, congreso o foro, con cu bo kier yam’e, esey no ta nada mas cu e promer paso cu mester tuma. Sin placa bo no por haci nada, y nos por ta sigur cu den e proximo decadanan nos lo ta gastando decenas di miyones pa aña na e asunto aki. Nos no a tende cu e mandatario concerni a duna un impresion di e inversion necesario cu su plannan ta bay requeri…