Kico Citgo a haci den casi dos luna…
Casi dos luna a pasa y nos no ta tende nada di empleo pa hende local na refineria. Durante e tratamento di presupuesto nos por a tende di ministro encarga cu labor, cu den e dianan aki nos por spera cu Citgo lo a cuminsa emplea hende local. Di banda di sindicato FTA nos por a tende un nota critico cu nan no ta mira nada ta sucediendo. E unico accion riba tereno di e refineria tabata e deramento di asbest, cu aparentemente no tin Citgo envolvi aden, pero mas bien ta un asunto entre Refineria di Aruba y Valero.
Durante tratamento di presupuesto tambe nos por a tende di ministro encarga cu energia, cu lo bay dura un poco, ya cu ta awor Citgo lo a bay haci un analisis detaya di kico tur mester tuma luga encuanto trabao di rehabilitacion. Di loke nos ta tende di fuente extra oficial ta cu tin bastante material cu a disparce, manera kabel di electricidad y otro elemento di e sistema pa detecta temperatura, presion, etc. Parce cu e ladronnan a haci uzo di e oportunidad pa haya ‘nan parti di e deal’.
Esaki lo haci cu e trabao di recuperacion lo dura mas largo ainda y lo bira mas costoso, mientras cu no ta tende nada di financiamento. Esey ta implica cu e efecto positivo cu esaki por tin riba empleo y importacion di material, loke ta trece placa aden pa gobierno, ta bay tarda mas pa ‘kick in’. Y esey ta mal noticia pa e panorama economico di Aruba na e momento aki. Fuera di e situacion tambaleante di economia, por a ripara cu e gremionan empresarial a cuminsa move, irita y preocupa pa e accion unilateral di gobierno pa hunga Sinterklaas, sin ni un momento considera discuti esaki cu e gremionan. Na e momento aki, Dialogo Social ta parce un recuerdo distante di pasado, y ya no ta pertenece na e arsenal di instrumento cu gobierno ta considera importante.
E mentalidad aki, di simplemente anuncia cierto medida, sin sikiera considera ken lo mester bay paga esaki, ta bin dilanti tambe den otro aspecto di e anuncio di nos Prome Ministro. El a anuncia cu gobierno kier hisa e salario minimo cu 2 porciento, punto. Despues e ta bisa cu e ta bay papia cu SER, pa mira kico nan ta bay haci. Esaki ta completamente contrario na e forma con e ley ta prescribi con pa maneha e asunto aki. Simplemente gobierno tur aña ta pidi conseho di SER, cu ta analisa e situacion socio economico. Ta investiga con economia a bay desde e ultimo cambio den salario minimo, con economia a crece o laga di crece, ta tuma na cuenta inflacion, etc. Finalmente ta bin un conseho, unanime o no, di e organismo aki. Poniendo su opinion di antemano, Prome Ministro ta pone presion riba e Conseho, pasobra e sa cu ey caba el a trece division entre e partnernan empresarial y esunnan sindical y pakico? Pasobra esunnan di sindicato nunca lo bay di acuerdo cu ta conseha contra un aumento y lo ta contento cu Prome Ministro a papia prome cu su turno… Asina no ta yega na un conseho unanime y e ta para un posibel conseho negativo, manera den e caso actual lo ta logico: economia no a crece, y no tabatin inflacion durante e ultimo aña aki. Pa loke ta e parametronan cu SER mester tuma na cuenta, nan no por conseha gobierno positivo, sin haci nan mes eternamente ridiculo. Pero di parti di Prome Ministro e actitud di soberbia aki di bisa SER:”duna mi un conseho di dos porciento, punto”, ta totalmente reprochabel. Esaki no ta manera pa anda cu e institucion importante aki, cu no por ta simplemente na merced di e mandatario di turno. Y kico ta uza contra nan si nan no obedece? E ‘rabia di pueblo’, e problema ta mas tanto pa e sindicatonan cu ta sinti e presion di nan miembronan.
Tur esaki no ta bin como sorpresa, pasobra e gobierno aki a demostra di sa masha bon unda e votonan ta: cerca e trahadonan y no cerca comerciante. Comerciante ta importante den tempo di campaña pa duna e conocido cheque, unda tin di nan cu ta duna tur partido algo, esun di nan preferencia ta haya mas naturalmente. Pero ora di prepara pa campaña den forma puramente populista, loke e empresario ta pensa ta irelevante. Loke por ta hunga un papel tambe ta cu gradualmente e partidonan grandi, y mas cu tur e partido actualmente den gobernacion, no mester tanto mas di e contribucionnan chikito di empresario chikito y mediano. Tin hopi mas sponsor grandi cu ta garantisa un campaña talbes mas luhoso cu na 2013.
Den tur esaki naturalmente no tin nada na caminda di un ley riba financiamento di partido politico, y ta parce cu hasta na Hulanda nan a stop di maha riba e tema aki, lagando Aruba asina como unico pais den Reino sin ley di supervision financiero pa campaña. Kico ta secreto di Prome Ministro cu e tin hasta Hulanda den un boter?
