E bolo di GDP ta keda reparti na manera aceptabel?
Hopi biaha sa compara e entrada total di un pais cu un bolo. E entrada total ey, expresa den Producto Interno Bruto (PIB, na Ingles GDP) ta e suma total di tur beneficio gana dentro di e teritorio. Normalmente, y pa hopi aña caba, e parti cu gobierno ta tuma pa su mes via tur tipo di impuesto ta varia rond di 20%. Por ehemplo, na 2014 ainda gobierno a cobra Afl. 998 miyon na impuesto, mientras cu su entrada total tabata Afl. 1114 miyon. Compara cu nos GDP pa 2014, calcula pa Banco Central na Afl. 4768 miyon, esaki ta duna nos un proporcion di e bolo di 20,9% na impuesto, y 23,3% si nos conta tur entrada. Tin varios pais den nos region cu tin un peso di impuesto mas halto cu esun di nos, pero tin mas aspecto pa tuma na cuenta.
Tin mas entrada cu ta bay pa gobernacion, si mira esaki ampliamente, loke den e terminologia cu por ehemplo Raad van Advies ta maneha, ta ser yama “Consolidated General Government”, compara cu “Central Government” cu ta gobierno so, cu su entrada y gastonan manera nan ta aparece riba presupuesto. Kico mas ta forma parti di e Consolidated Government? E contribucionnan cu ta ser haci pa Seguro Social y Seguro Medico General. Laga nos tira un bista riba e cifranan pa 2014 y 2015.
Na 2014, Gobernacion Amplio, ban yama esey asina, a haya total Afl. 1.939 miyon, di cual Afl. 632 miyon tabata entrada di Seguro Social y Seguro Medico. Esaki segun e resumen di Conseho Consultivo den su conseho pa presupuesto 2014. Na 2015 tin proyecta segun e mesun fuente, Afl. 1963 miyon na entrada, di cual Afl. 688 lo ta pa Seguro Social y Medico. Den esaki sin embargo no ta conta ainda e 1% extra di BAZV cu a bin aden na juli 2015, cual den e aña aki por haci un diferencia extra di alrededor di 20 miyon, pa un total di Afl. 1983 miyon, casi 2000 miyon.
Na 2014, gobernacion den sentido amplio a haya 40,6% di nos GDP nominal di e aña ey (Afl. 4768 miyon). Si nos calcula un porcentahe di 3% nominal di crecemento di GDP pa 2015, nos GDP 2015 por bira Afl. 4911 miyon. Riba e base aki e aña aki gobernacion en general ta haya alrededor di 40,4%, practicamente e mesun nivel di 2014.
Pero, con esaki ta relaciona cu otro pais, cuanto gobernacion ta haya, y mas importante ainda, kico nan ta haci pa e ciudadano pa loke e ta contribui? Un vistazo rapido:
Na Hulanda na 2010 gobernacion tabata haya alrededor di 50 – 51% di GDP; otro paisnan Europeo tambe ta den e range ey, cu e paisnan di Scandinavia un poco mas halto, rond di 55%. En cambio Spaña y Alemania ta score mas abao, 45 – 48%. Suisa ta hopi mas abao, na 34,2%. Kico ta e diferencia entre tur e paisnan aki y por ehemplo Aruba? Nos seguro social y medico no ta comparabel cu loke nan tin. Tur e paisnan aki tin tambe beneficio social na ora di perde trabao, aunke tambe den e paisnan aki nan a haya bishita di e crisis economico mundial y mester a corta bastante den esaki. Na Aruba nos no a pensa mes nunca den direccion di un beneficio di desempleo, ya cu a considera esaki impagabel. Tambe riba tereno social y medico e servicionan brinda ta mas sofistica y mas dirigi detayadamente riba cierto gruponan cu mester atencion special. Cerca nos aki na Aruba, atrobe, esey lo ta fuera di nos alcance financiero. Y mas cu tur cos, nos ta desea di bay den e direccion ey? Sigur cu tin cierto forma di cuido social y medico cu lo bira absolutamente necesario, sigur si nos bay tuma cuenta e crecemento drastico di e poblacion di edad, y sigur dentro di e grupo aki esunnan di edad hopi halto (75 aña of mas).
En todo caso, ta bira bisto cu e solucion pa nos situacion, no ta den aumento di e porcentahe di e bolo nacional cu gobierno ta garando caba. No solamente e ta bay a costo di e entrada di e ciudadano y e empresario, nos no tin un garantia cu e placa den man di gobierno ta ser uza pa cosnan necesario. Ademas nos tin caba como agravante cu gobierno ta desea di gara 1,5 pa 2% di GDP pa financia su proyectonan ‘PPP’ pafo di su presupuesto, cual ta bay costa nos un extra 90 – 100 miyon extra pa aña. Pa paga esaki ta pensa di introduci e impuesto riba transaccion bancario, di cual ultimamente no ta tende tanto pero cuidao cu e no ta core sali riba nos den dianan di fiesta den december.
Bottom line: den un frega di wowo nos por ta na un nivel di 45% di e bolo nacional cu ta bay pa gobernacion amplio: esey nos ta desea? Unda ta hala un liña?
