Director di departamento di Labor, Franklin Kock, den presencia di minister di Labor, Glenbert Croes a declara cu e terminacion di acuerdo of relacion di trabou no por wordo imponi. Pero esaki ta e tipo di casonan cu nan ta bin hayando ultimo dianan.
El a splica cu e condicion di trabao cu ta tanto dunado di trabao como y trahado a yega na dje, a nace a base di acuerdo mutuo. “Cambionan mester ta di acuerdo mutuo,” el a bisa. Kock a agrega cu e crisis cu pais Aruba ta pasando aden, entre otro riba tereno laboral, no ta kita e caracter y relacion cu ta existi entre e dunado di trabao y e trahado. E punto aki pa DAO su maneho ta hopi importa, ya cu ‘mester yega na acuerdo mutuo y no impone cos,’ el a indica
Criterio pa FASE.
Igualmente el a referi cu pa suavisa e dolor financiero cu e efecto cu e coronavirus/Covid-19 tin riba nos pais, y e cantidad di hende cu a perde nan entrada, gobierno a dicidi di bin cu un fondo di asistencia social di emergencia. E intencion ta pa yuda mas trahado cu por tin den un poblacion di mas cu 50 mil trahado.
P’esey mes DAO a bin cu algun criterionan pa algun trahadonan por haya ayudo economico via e FASE (Fondo di Ayudo Social Economico). Un criterio basico tin di haci cu e plan di sobrevivencia di e compania. Ademas un carta unda e dunado di trabao mester indica e tipo di compania, servicionan, efectonan di e crisis actual riba e lunanan april, mei y juni. Tambe nan mester specifica na ki sorto di acuerdo mutuo e dunado di trabao a yega cu su trahadonan pa no mishi negativamente cu e condicion di trabao. Ademas di nan ID y nan pay slip y si ta un compania riba su mes su BBO.
Kock a bisa cu nan mester di e carta ey pa nan por sa con hopi trahado a wordo afecta. Pasobra pa e trahadonan por bin na remarca di e FASE, e mester bay atras den su sueldo. Pero tambe e mester tin di haber cu e crisis causa pa e coronavirus, y e mester cay bao 950 florin.
El a splica cu nan ta criteria cu nan ta uza pa nan por tene e fondo aki pa e trahadonan den necesidad manehabel. Kock a indica cu gobierno kier yuda trahado, pero no ta cu e shelo ta e limite den caso di placa. Ya cu logicamente lo bin control financiero cu nan mester por cumpli cu nan pa medio di diferente instancia. Pero tambe nan kier haci un bon trabao pa tur trahado den necesidad por haya nan placa.
Igualmente e ta consciente cu na final di maart hopi trahado a cobra of a cobra poco menos. Pero tin hende cu ta traha pa kinsena of pa luna, y e luna di april cu a cuminsa core, sigur ta bira uno complica pa hopi hende.
