Aruba Airport Authority N.V. (AAA), e compania cu ta maneha y opera Aeropuerto Internacional Reina Beatrix (AUA Airport), ta orguyoso pa anuncia cu Frontier Airlines lo cuminsa opera pa Aruba na November 2021.
Pa Frontier Airlines, mesos cu pa AUA Airport, berde no ta djis e color di nan logo. E ta un recordatorio diario di nan mision y meta pa ta America su aerolínea mas berde/sostenibel. E idealnan aki ta cuadra perfectamente cu AUA Airport su plan strategico pa bira e aeropuerto mas sostenible den e region.
E aerolinea cu su headquarter ta situa na Denver, Colorado, ta opera mas cu 100 avion di e famia di avionnan A320 y tin e flota mas grandi di avión A320neo den Merca, sirbiendo aproximadamente 12 destinacion na Merca, Caribe, Mexico y Centro America. E plan inicial ta pa cuminsa na November 2021 cu un buelo semanal for di Miami International Airport (MIA).
Cu mas di 140 avion Airbus nobo den bestelling, Frontier Airlines lo sigui crese y desaroya su mes riba su mision pa brinda opcionnan di biahe mas economico y berde, conectando Aruba cu mas di 100 destinacion den full America.
“Nos ta ansioso di por anuncia e servicio pa AUA Airport cu buelo non-stop pa Miami cuminsando November,” segun Daniel Shurz, senior vice president of commercial, Frontier Airlines a bisa den un comunicado di prensa. “Nos mision ta pa brinda prijs abou y husto pa nos clientenan y nos ta sigur cu e ruta nobo aki lo haci biahamento pa e isla ainda mas accesibel y economico pa turistanan, mientras na mesun momento dunando e localnan tambe un opcion atractivo pa biaha pa Merca. Nos ta ansioso pa yama bonbini na pasaheronan cu lo bai disfruta di e bunita paisahenan y e hospitalidad caluroso di Aruba y pa sirbi e localnan cu vuelonan economico pa Miami y resto di Merca danki na nos network extensivo di ruta den Merca.”
“Na AUA Airport, nos ta dedica seriamente na Air Service Development! E esfuersonan di e ekipo cu a cuminsa prome cu e pandemia, awo ta cristalizando cu e adkisicion di un aerolinea nobo cu ta wordo agrega na e portfolio diverso di aerolineanan cu ta kere den Aruba y nos aeropuerto internacional. E prome paso aki den nos relacion cu e low-cost carrier Mericano popular lo brinda opcionnan di biahe adicional pa e pasaheronan local y for di Merca, segun e motto di Frontier Airlines, “The sky is for everyone.” Frontier Airlines ta percura pa cumpli cu e vision aki door di brinda opcionnan economico. Como un aerolinea creciente y consciente di medio ambiente, e aerolínea ta cuadra perfectamente cu AUA Airport su vision pa futuro. Plannan di expansion y pa bira e aeropuerto mas sostenibel den e region ta aplicabel pa tanto AUA Airport y tambe Frontier Airlines,” asina Sra. Jo-Anne Meaux-Arends, Air Service Development Manager na AAA a expresa.
“Nos ta contento di por cuminsa e servicio nobo aki cu Frontier Airlines for di Miami, un di nos mercadonan cu prioridad. Mirando aña pasa, aumento den airlift ta crucial pa Aruba su recuperacion y crecemento di turismo continuo, y continuamente nos ta purba di ofrece opcionnan di biahe expandi pa bishitantenan nobo y pa esnan cu ta regresa Aruba. E esfuersonan di Frontier pa reduci nan “carbon footprint” pa sigura un mundo mas limpi ta cuadra tambe cu Aruba su maneho pa trece conscientisacion y educacion na publico.” asina Sra. Ronella Croes, CEO di Aruba Tourism Authority a bisa.
“Un aerolinea y vuelonan adicional pa Aruba ta e resultado di esfuersonan di AUA Airport y autoridadnan di turismo, y ta testimonio di e demanda pa Aruba como destinacion, danki na e hendenan maraviyoso cu ta traha tur dia pa sirbi nos turistanan y sigura un experiencia dushi y safe,” asina Sra. Tisa LaSorte Presidente y CEO di Aruba Hotel & Tourism Association a bisa.
