Miembronan di Comerciante Uni Aruba (CUA) a expresa preocupacionnan tocante e situacion actual cu nan tin pa loke ta trata e cobransa di e ayudo cu nan ricibi durante pandemia, loonsubsidie, for di Sociale Verzekeringsbank (SVB).

Durante un conferencia di prensa cu algun medio di comunicacion local, presidente di CUA, Franses Ponson a indica cu e miembronan di CUA tabata hopi preocupa y tabatin hopi pregunta pa loke ta e cobramento aki.

CUA a tene un reunion cu SVB algun tempo atras, cu segun Ponson a señala a bay hopi bon, na unda SVB a contesta tur e preguntanan di preocupacion di miembronan. Pero aworaki e comerciantenan a haya un otro preocupacion. Comerciante a ricibi recordatorio for di SVB y organisacion ta exigi pa e cobransa di loonsubsidie wordo paga den cinco luna.

Ponson a splica cu locual nan trece dilanti ta cu nan ta hopi contento cu SVB a duna un oportunidad di seis siman mas pa asina e comerciantenan por entrega un obhecion. El a subraya tambe cu niun miembro y niun comerciante, te cu CUA ta na altura di dje, no ta nengando di paga. Loke nan kier puntra SVB ta pa wak cada caso individual di esnan cu ta den un situacion dificil pa paga na e momentonan aki.

Mayoria di nan ta pagando, mayoria di nan por pag’e den cinco luna, pero no ta tur. E grupo mas chikito ta esun cu tin mas dificultad pa pag’e den cinco luna. Un placa cu a wordo distribui den un aña y mey pa dos aña y mey. Na cuminsamento e comerciante no tabata na altura cu mester pag’e back, pero el a bira claro despues.

“Nos ta compronde cu aworaki economia ta lantando back y placa ta cuminsa drenta back. Nan no ta nenga di paga, kiermen nos ta haya jammer cu un compania chikito aworaki tin cu hay’e den un situacion, pasobra no ta SVB so ta nan tras, aworaki tur hende ta nan tras, kiermen nan ta haya tur e gastonan atrasa ta bin”, el a indica.

E suplica cu CUA ta haci na SVB ta pa wak e caso di companianan chikito cu no por handle un pago den cinco luna, pa wak e casonan aki individual. Ponson a remarca cu CUA a bisa tur nan miembro, cu no por paga den cinco luna di tempo, pa entrega un obhecion. “Nos ta pidi SVB e ora pa tuma consideracion cu esaki, wak nan y por ta extende nan dia di pago”, el a agrega.

Na mesun momento el a enfatisa cu e comerciantenan aki no ta nenga di paga, pero e parti dificil pa nan ta e exigencia pa haci e pago aki den cinco luna. Aunke e grupo di comerciante chikito cu tine dificil pa haci pago den cinco luna ta un grupo chikito, CUA ta haci peticion na SVB pa por fabor wak e casonan individual pa wak na ki acuerdo por yega na dje cu e comerciantenan aki.

Ponson a recorda cu na principio ora cu a anuncia e ayudo aki niun caminda a bisa cu eigenlijk tabata a placa aki tabata fia. A bisa claramente cu e ayudo tabata pa mantene trahadonan na pia di trabao.

El a señala tambe cu segun nan a compronde SVB no por a controla tur hende, of tur compania, e tempo ey y ademas el a enfatisa cu e comerciantenan aki ta esnan cu a yuda stabilisa economia di Aruba e tempo ey teniendo tur hende na pia di trabao, pero di otro banda esey no ta nifica cu e comerciantenan a gana hopi placa of suficiente placa pa por paga un debe asina den cinco luna di tempo.

“Aworaki riba dje bo ta bisa nan cu den cinco luna bo tin cu pag’e tur, esun cu por por, pero esun cu no por ta imposibel pa forsa nan pasobra berdad ta comercio a tene e hendenan na trabao cu no ta tur hende a bay cas. Imagina bo cu tur hende lo a bay cas. Kiermen esunnan cu ta dispuesto pa paga nos ta djis pidi cooperacion pa nan haya un uitstel pasobra nan no a haye den cinco luna tampoco, nan tambe a haye parti den casi dos aña. Ta hopi dificil pa aworaki out of nowhere cu economia a lanta exigi nan cinco luna y si no bay boetnan, lo ta hopi dificil pa nan”, Ponson a resalta.

Pa e motibo aki CUA a bin dilanti den representacion di su miembronan pa puntra cooperacion di banda di SVB e biaha aki pa wak e casonan di e comerciantenan chikito den forma individual. Ponson a remarca cu e miembronan aki ta bay entrega un bezwaar y di forma aki SVB lo por wak e casonan individual pa haci excepcion pa e grupo aki y por ta extende mas cu cinco luna e pago di loonsubsidie. “Cinco luna probablemente no ta tur por pag’e e ora tanto bal, no a cera nan den pandemia pero nos ta cera nan awo”, el a expresa.

Ponson a indica tambe cu e situacion aki por ta peligroso ya cu algun comerciante lo por cera porta y laga trahadonan bay. Aunke no ta un grupo, Ponson a subraya cu ta jammer cu nan a yuda e comerciantenan aki durante e tempo duro pa aworaki nan lo mester cera pa motibo cu nan no por cumpli cu un pago den cinco luna.

Tin un par cu a yama mi y bisa mi cu si nan mester paga den cinco luna e ora nan no lo make it. Pero ta jammer cu nos a yuda nan tur e tempo y aworaki nan tin cu cera y mas jammer si un compania ta bisando cu na ta dispuesto pa paga”, el a enfatisa.

Ponson a extende peticiona na Gobierno di Aruba pa hunto cu SVB wak e casonan di e obhecionnan cu ta bay drenta aworaki, sobretodo di esunnan cu ta pidi pa extende e tempo, pa asina logra coopera cu nan.