CUA a trece dilanti proposicion pa introduci Uber na Aruba, pero solamente pa taxistanan

Ayera mainta Comerciante Uni Aruba (CUA) a tene un conferencia di prensa durante cual Frans Ponson, presidente di CUA, a trece dilanti e topico di taxistanan na Aruba y a elabora ariba con por bin cu cambionan cu por mehora e industria.

Recientemente e topico di taxistanan tabata hopi popular na Aruba, cu e cambio di maneho pa loke ta trata traspaso di permiso di taxistanan, cambio den e cantidad di pasaheronan cu por transporta, e protesta di dos dia di e taxistanan contra e cambionan aki y e reunion programa pa mañan entre e grupo aki y minister di transporte.

Ponson ta splica cu nan a bay investiga un poco mas ley pa asina trece dilanti nan punto di bista riba e topico aki y e perspectiva di CUA.

El a resalta cu den e ultimo 20 añanan mundo a modernisa na gran escala, tecnologia a avansa di tal manera cu ya aworaki tur cos por ser realisa for di telefon. Esaki a hiba Ponson na e punto cu e kier trece dilanti, cual ta e punto di Uber.

El a splica cu Uber tabata un topico discusion cu e taxistanan, pero esaki a ser rechasa. CUA kier trece dilanti su vision y punto tocante con nan kier trece Uber dilanti pa comunidad.

Ponson a indica cu e taxistanan ta contra di introduccion di Uber pasobra nan ta kere cu nan lo bay atras. Ponson a presenta un documento, di algun aña atras, cu ta indica cu na momento cu introduci Uber e ta bay cuminsa poco poco, pero ora cuminsa haya hopi cliente ta haci uso di dje e ta bira bon algo bon pa e taxistanan.

El a sigui splica cu aworaki un taxista ta bay hotel y tin cu para warda pa e yega na beurt pa transporta turista, y probablemente e ta tarda algun tempo despues prome cu e taxista por haya otro pasaheronan pa transporta.

El a remarca cu ora cu haci uso di Uber, y cu e bira popular na Aruba, un taxista ta hiba un pasahero na su destino final y eynan na e mesun luga e por haya otro pasahero pa subi e taxi atrobe.

Ponson a subraya cu e total di tempo cu un taxista tin persona den auto of ta transporta un persona ta aumenta na 45 minuut den un ora, compara cu e 28 minuut di un ora cu e tabata prome, y esey, el a resalta, ta basa riba indicacion di un documento bieu.

“Loke nos kier propone na taxistanan y gobierno den nan proximo meeting ta pa nan bin cu un Uber, pero ta tene esaki solamente pa e taxistanan. Nos no ta papiando pa bin cune pa henter e pueblo. Pa por traha cu Uber bo mester tin un permiso di taxi y asina taxista so ta core pa uber,” el a destaca.

El a agrega cu teniendo e proposicion aki den mente, e no ta compronde pa ki motibo ainda no por yega na un modernisacion pa loke ta trata e sistema di taxi na Aruba. “Nos no sa pakico ta tene full un pueblo hostage di no modernisa, pasobra nos tur kier modernisa, siendo cu boso so tin e vergunning, boso so por core. Pakico na Aruba nos kier tene full un pueblo hostage?” el a cuestiona.

Pa loke ta trata e beneficionan cu introduccion di Uber por tin, Ponson a remarca cu na final di dia e taxistanan ta bay gana mas placa pasobra nan ta bay tin mas hende y pa mas tempo den auto.

El a sigui splica cu e beneficio pa pueblo ta bay ta insuperabel. El a trece dilanti cu un cantidad di taxista ilegal ta core pa hiba hende trabou, entre otro. Cu Uber ta bira mas facil pa un persona por pidi un transport, legal, y e taxistanan por gana cu esaki tambe.

Un punto cu Ponson a subraya ta cu anochi, hopi ta core bao influencia. El a splica cu falta di taxi parti anochi ta un hunga un rol, ya cu na momento cu un persona ta bao di influencia y no tin hende, hopi biaha no por haya un taxi pasobra anochi no tin hopi taxi disponibel.

El a resalta cu introduccion di Uber por yuda cu e problema aki, ya cu e ta bira mas accesibel y facil pa busca un taxista cu e app di Uber. Esaki ta contribui na e parti di seguridad di trafico, y ademas e ta beneficia e turista tambe. .

Ponson a clarifica cu e proposicion cu nan ta trece dilanti no ta nifica cu ora un taxista cu permiso core cu Uber no kiermen cu e no por core cu su taxi regular. El a indica cu e taxista e ora tin dos opcion, e ta dicidi si e kier core cu Uber of taxi normal.

Mirando e beneficionan y e proposicion cu e Uber ta habri solamente pa taxistanan cu permiso, el a remarca cu nan no ta compronde dicon taxistanan asina contra pa bin cu algo moderno pa e pueblo.

Treciendo dilanti e protestanan di e taxistanan, Ponson a indica cu nan ta respeta e derecho di protesta di tur gremio, pero CUA a haya lamentabel cu aworaki cu turismo e industria number uno na Aruba, el a ser afecta door di e protestanan.

El a agrega cu un punto cu a bin dilanti di parti di e taxistanan durante e protestanan ta cu algun a sali publicamente y bisa pueblo cu nan tin 15, 20 of 25 aña di retraso cu pago di impuesto.

“Esey si pa Comerciante Uni a haci un poco dolor. Nos tin hopi miembro, hopi eenmanzaak y mi ta sigur cu 80% na KvK ta di companianan chikito cu si tin cu paga inkomstenbelasting,” el a resalta.

El a sigui splica cu CUA a reuni cu DIMP pa puntra si esaki ta berdad, pasobra segun taxistanan ta pa culpa di gobierno nan tin retraso. DIMP a confirma na CUA cu nunca nan a tende loke taxistanan a menciona cu ta problema di gobierno pa paga inkomstenbleasting, pasobra ta na cada persona pa entrega su papel y paga inkomstenbelasting.

“Esey nos ta lamenta si. Pero publicamente den bo derecho di bay dilanti bo ta bisa bo tin 20, 25 aña di retraso di belasting. Esey nos ta lamenta pasobra e ta trece problema den sector priva. Tur trahado na Aruba tin cu paga y esey ta algo cu nos ta lamenta,” el a indica.

Por ultimo, Ponson a destaca cu e industria di Aruba mas grandi ta turismo y Aruba ta atrasa den e aspecto di tecnologia. El a subraya cu e punto principal ta cu mester modernisa, sea ta cu Uber of un compania priva local cu ta traha un app pa taxista.

“Nos mester bin cu algo pa turismo y pueblo di Aruba, pa e seguridad. Nos no ta pensa cu nan ta bay atras, nan ta bay dilanti, nan ta bay gana mas placa y e beneficio ta pa nos tur,” el a enfatisa.