Cu un inversion di casi 80 miyon florin di full proyecto: Renobacion di piso cuatro y cinco di hospital por keda cla otro luna

Diahuebs pasa, henter comunidad a lanta cu un yobida hopi fuerte. Hospital Horacio Oduber a keda afecta pa algun otro motibo, pero entre nan tabata pa e yobida fuerte. Di otro banda, comunidad por mira cu den ultimo lunanan e luga aki a ser desaroya y remodela pa mehora e servicio pa pashent y duna hospital un aire ‘mas fresco y trankilo’.

Durante un conferencia di prensa cu directiva di hospital a ofrece siman pasa, director di Cuido di Pashent, Ezzard Cillie a comenta cu hospital a inverti casi $80 miyon na ekipo y mobiliario. Cillie a bisa cu nan tin hopi ekipo, por ehempel den laboratorio nan a trece ekipo nobo hopi sofistica. Tambe a sigura cu tin caso cu excepcion cu nan por sigui uza aparatonan bieu, pero lo cual nan no mester cambia, nan no ta bay cambia. Tambe pa motibo di parti di AZV nan a haya cu ta gasta hopi placa pa cuido y e cifra ta demasiado halto y nan a cuminsa corta di un forma hopi riguroso.

“Esey por trece consecuencianan, unabes bo ta corta financieramente riba e cuido di pashent” Cillie a sigura.

Medionan local a haya oportunidad pa haci un recorido na piso cuatro y cinco di hospital bieu, hunto cu directiva di hospital y personal di SOGA. Manager di e proyecto di construccion, Ghislaine Gomez, parti di e proyecto di renobacion di hospital y parti di mudamento, a expresa cu di loke ta trata e di cinco piso di e toren existente lo bira e parti administrativo, cu den futuro tambe nan lo por cambia pa un patientenafdeling.

Tocante e tuberianan y tur loke ta necesario pa pone un patientenafdeling, esakinan ya ta poni bou di piso y den muraya, Gomez a informa.

Di cuatro piso cu lo bira piso di oncologia, den cual lo tin cambernan di dos pashent y tambe cambernan di un pashent, cu ta bira ‘camber isola’. Cada piso lo haya un cantidad di camber asina.

“E luga lo tin un ambiente mas fresco pa nos trahadonan pero principalmente pa nos pashent; bentananan grandi, luznan, colonan cla y esaki ta pa e pashent por ta mas comodo”, Gomez a señala.

Gomez a bisa cu SOGA a comenta cu e parti di mudamento por cuminsa na luna di october, cu tambe nan tin un plan caba cu toren A y tur esaki ta forma parti un facilidad moderno.