Biblioteca Nacional Aruba (BNA) ta anuncia un acontecimento importante den cuadro di nan 70 aña di existencia. Directora di BNA, Astrid Britten, a bisa na Bon Dia Aruba, cu nan usuarionan por tin acceso na e database di e compania EBSCO.

Britten a declara cu den cuadro di e hubileo aki, ya caba pa cuminsamento di aña, BNA a cuminsa cu e implementacion di un sistema nobo di sistematisacion. Den esaki nan a inclui e database di e compania renombra EBSCO cu ta duna acceso na tur sorto di informacion, pero tambe na ebooks.

Tur esaki den cuadro di innovacion cu tin den e institucion aki, ya cu e desaroyo actual ta mustra cu biblioteca no ta un luga di presta buki mas, sino cu nan a amplia nan portafolio di servicio. “Biblioteca ta para pa acceso liber di informacion,” el a bisa na e matutino aki.

E siman aki nan ta dunando recapacitacion na nan empleadonan pa nan ta empodera y tin e instrumentonan pa brinda e servicio optimal y di calidad cu BNA ta desea. E ta haya cu e acceso na e database di EBSCO via e website di BNA, nan ta dunando un paso mas leu atrobe riba tereno di innovacion y acceso na informacion online pa medio di database confiabel. Asina e cliente por ta sigur cu e informacion obteni cu bo por conta riba dje.

“Esey ta importante tambe den e mundo cu nos ta bibando aden,” el a bisa.

EBSCO Information Service.
Rafael Lagares, kende ta Regional Sales Manager di EBSCO a haci un presentacion con e usuarionan di BNA por tin acceso na e banco di dato aki via e website di biblioteca. El a bisa cu awendia e pakete cu nan a ofrece na BNA ta permiti pa e usuario di nos biblioteca tin acceso na mas cu 65 mil ebooks of buki electronico pa nan wordo uza di forma ilimita y concurencia.

Tur esaki via e website di BNA, unda e usuario por wak e logo di EBSCO host y sigui e link aki despues di click riba dje. Si bo kier haci uzo di e servicio aki pafo di e biblioteca, bo mester un password cu mester diligencia cerca un empleado di BNA. E servicio aki ta activo 24×7 henter aña.

Durante e ultimo 17 aña, Lagares ta biniendo Aruba caminda e tin contacto cu institucionnan manera Universidad di Aruba, Scol di Medicina y Dr. Horacio E. Oduber Hospital, y aworaki na BNA. Nan tin un banco di dato amplio pa atende e necesidadnan di tur sorto di institucion y area di trabou. Te hasta pa tin acceso na documentonan y bibliografia di nos region Caribense.

EBSCO Information Services ta un compania cu 75 aña di existencia y nan tin un presencia di un 90% den tur universidad rond mundo y oficina den mas cu 55 pais. E ta e compania cu e database cu mas contenido na nivel mundial. Nan tin mas cu 400 banco di data den tur area di conocemento y tur sorto di publicacion, entre nan miles di revista academico, corant, conferencia, etc.