Ayera den oranan di atardi a bira conoci cu e politico y lider di partido PPA, Lisette M. Malmberg a retira for di politica ora el a publica un carta hopi emotivo riba su rednan social.

“Aruba, dushi dushi tera.

Bo bunitesa, bo bondad, y bo balentia ta keda inspira mi pa traha pa bo futuro cu e speransa pa un generacion cu merece pa conoce bo den bo pureza y sinti proteha den e oportunidadnan cu bo ta brinda.

Na ki momento bo a stop di kere den bo mes? Unda bo a acepta e mentira cu cos no por, no lo cambia? Unda bo a entrega na cansancio y desapunto y bo a laga otronan tuma e rienda di bo destino y hiba bo unda bo no kier bay?

Mi a kere, mi a spera cu bo tabata cla pa un cambio di rumbo pa traha hunto pa restructura, reforma pa asina transforma nos nacion y reconstrui e caminda pa nos destino.

Con bo por bira un nacion caminda TUR por prospera sin tuma e decisionnan dificil y paga e prijs awo pa por tin un miho mañan?

AMI a pensa cu por ta for di “paden” den politica lo ta posibel pa trece un diferente forma di pensa, un cambio den nos liderazgo y gobernacion. Mi a tuma curashi pa drenta un area cu poco den sector priva kier drenta, pero mi no a realisa kico ta rekeri pa ta exitoso den politica na Aruba, y mi tin cu admiti cu ami no ta e persona indica pa esaki, pasobra mi contribucion y influencia ta miho inverti trahando den e area civico y social. Mi a conclui cu e ta tuma responsabilidad di cada un di nos como ciudadano y residente pa transforma un nacion. E no ta solamente un responsabilidad politico.

P’esey, despues di profundo reflexion, mi ta anuncia mi resignacion como lider di Partido PPA pa asina sigui dedica mi mes na trabounan filantropico y actividadnan cu organisacionnan y fundacionnan local cu metanan comun.

Mi compromiso pa mira nos realisa nos “miho mes” ta keda kima den mi y mi lo sigui traha den diferente forma pa por contribui na e bienestar di nos gran pais. Mi kier a gradici tur persona cu den cualke forma a encurasha, sostene y finalmente vota pa PPA. Cada un cu a pone nan confiansa den mi persona…masha danki.

PPA lo sigui ta un plataforma politico cu compromiso pa cambio real y ta trahando duro pa reorganisa y busca lidernan den comunidad cu kier y por trece un cambio den e area politico.

Pronto mi lo informa tocante e proximo proyectonan cu mi ta formando parti di dje.

Mi dushi pais, Aruba, mi deseo pa bo ainda ta pa bo crece y bira un nacion den cual TUR por florece,” Malmberg a señala.

Malmberg a fungi como candidato lider pa partido PPA den ultimo eleccion na Aruba di aña 2021 na unda el a haya 943 voto.