Sea ta cabrito na Wales of porco salvahe na Italia, animalnan rond mundo ta parce di ahusta bon na bida sin humano durante brote di coronavirus.
Hasta leonnan ta disfrutando di e paz y trankilidad, segun un set di potret di Parke Nacional Kruger na Sur Africa ta mustra.
E imagennan ta mustra un grupo di leon descansando riba caminda, aparentemente sin disturbio di e presencia di e fotografo, park ranger Richard Sowry.
“E grupo di leon aki usualmente ta residente di Kempiana Contractual Park, un area cu turistanan di Kruger usualmente no ta mira”, Kruger a tweet diaranson. “Awe tardi nan tabata drumi riba caminda pafo di Orpen Rest Camp.”
Riba un dia normal, e area lo ta druk cu turista, pero Kruger ta cera desde dia 25 di maart como parti di lockdown nacional di Sur Africa pa combati coronavirus.
“Drumiendo riba caminda durante dia ta inusual, pasobra bou circunstancianan normal lo tin trafico y esey ta pone nan den matanan”, segun vocero di e parke, Isaac Phaahla a bisa CNN.
Mientras e potretnan ta impactante, Phaahla a bisa cu e lockdown no a conduci na hopi cambio den comportamento animal. “Nan ta djis ocupa espacionan cu normalmente nan lo evita ora tin turista”, el a bisa. “Hende mester corda cu KNP ta un area salvahe grandi y den ausencia di humano, bida salvahe ta mas activo.”
Maske bishitantenan ta prohibi, entrega di cuminda, provision di fuel, servicionan di siguridad y emergencia como tambe operacionnan di crimen di bida salvahe ta continua, segun South African National Parks (SANParks) a bisa den un declaracion.
“Nos kier gradici publico pa nan sosten continuo den linea cu e strategia di gobierno pa mitiga impacto di COVID-19, nos tur tin un obligacion pa ‘flatten the curve’”, CEO di SANParks, Fundisile Mketeni a bisa den e declaracion.
Presidente di Sur Africa, Cyril Ramaphosa inicialmente a anuncia un lockdown di 21 dia, pero den un anuncio dia 8 di april a extende e medidanan te sikiera fin di luna.
