Desde dialuna Cuerpo Policial a manda informacion cu hunto cu Ministerio Publico a dicidi pa haci e suma di recompensa pa tip cu lo yega na detencion den caso di Yellow. Den entrevista cu vocero di Ministerio Publico Ann Angela, el a bisa cu asina ta spera cu e ta mas atractivo pa hende cu ta dispone di informacion bin dilanti cu esaki.
Polis ta trahando incansablemente pa resolve e caso aki, y ta asumi cu e ta na Aruba ainda y e ta e unico persona cu ta wordo busca te cu aworaki ta Yellow como e sospechoso di a viola articulo 2:262 c.q. 2:259 di e “Wetboek van Strafrecht van Aruba” y articulo 3 di e “Vuurwapenverordening”, sra. Angela a bisa.
“E suplica na pueblo di Aruba di parti di Ministerio Publico y polis ta mescos cu a bay ta bisa e ultimo dianan aki, esta, cu si sa di paradero di e sospechoso aki sali pa dilanti y tuma contacto cu polis. Trahando hunto y dunando otro un man, nos por logra pa pone man riba e sospechoso prome cu pasco, pa asina comunidad por respira y pasa un pasco den paz y trankilidad sabiendo cu e persona aki ta deteni,” Sra. Angela a termina bisando.
Aumento recompensa
Actualmente e suma di recompensa pa e tip cu lo hiba na detencion di Yellow ta na 10 mil florin. Aunke cu nan ta indica cu regularmente tip ta drentando na polis, toch te ainda no a logra haya e tip di oro, cu por a yuda na detene e sospechoso Yellow. Esey a conduci cu a opta pa redobla e recompensa di 5 mil florin. A puntra un reaccion di vocero di Cuerpo Policial pa e cantidad di tip cu nan a ricibi mientrastanto, sinembargo e no a duna contesta di esaki. Tin duda considerabel riba si berdad hende ta haci uzo di e oportunidad y yama duna tip mirando cu mester laga nomber, fam y number di telefon atras.
