Marduga a keda aproba presupuesto 2016 di pais Aruba manera menciona anterior. Presidente di Parlamento Marisol Lopez – Tromp (AVP), ta e unico persona cu a vota contra di un posibel reapertura di refineria. El a splica cu un posibel reapertura di un refineria por genera mas entrada y actividad economico pa nos pais y tambe cierto cuponan di trabou. Di otro bandanan tin aspectonana cu tambe ta pisa cual entre otro esun di salud.
E tambe ta remarca cu aunke kier habri un refineria ‘green’, e ta keda un refineria cual tin consecuencia no solamente pa medio ambiente pero tambe pa calidad di bida den San Nicolas
‘No ta fabrica di perfume’
Ta asina cu e mesun Parlamento aki cu cual mayoria a vota pa reapertura di refineria ta e mesun parlmento cu no mucho tempo pasa tabata tin discusion pisa riba consecuencianan di cierto materialnan por ehempel di construccion y asbest, e Presidente ta sigui bisa. E ta referi na e caso di asbest na scol. “Ni maske con milieuvriendelijk kier haci’e, e no ta un fabrica di perfume ta habriendo, pues mester ta consistente.”
Contrario di maneho green
“Mi experiencia di tur añanan cu tabatin refineria (como Minister e tempo ey di Infrastructura), bo ta wak hopi desaroyo y proyecto bunita cu no por a cristalisa na San Nicoals pa motibo cu e investor nan ta mira e tubonan cu huma ta sali for di dje. Y no ta un area cu ta desea di bin cu proyecto cu ta eleva calidad di bida. Mas aun cu gobierno a enfatisa pa e ultimo añanan cu e lo bin cu un maneho green cu den e caso aki enfasis riba medio ambiente y hopi placa di presupuesto a bay pa esey. No solamente conferencianan pero tambe MOU’s cu a wordo firma di e topico aki, pues ta full contrario pa bisa cu bo ta bay haci reapertura di un refineria”, el a termina splicando.
Mas por lesa den e Bon Dia Aruba mañan.
