Aruba tin un presupuesto aproba pa 2024, y cu ta mustra bon perspectiva. Esey no ta nada straño pasobra nos tin un economia pujante y a base di esaki gobierno a logra crea un acumulacion fuerte di entrada pa su mes, cu ta duna un surplus grandi pa aña venidero. Esaki despues cu e aña aki caba entrada di gobierno a subi bastante mas cu a anticipa, a base di e aumento di BBO na inicio di aña y e introduccion di BBO na frontera, ademas di otro medida di impuesto. Motibo pa hubilo? Si, pa loke ta nos economia, nos no tin nada di keha. Cu gobierno su asuntonan ta bayendo bon tambe ta positivo, aunke aki ta depende con bo ta mir’e.

Nos por a tende di un parlamentario gubernamental expresa cu Aruba su GDP ta mas halto cu nunca y cu nos GDP ‘per capita’ tambe ta historicamente halto. Esey ta berdad, pero ta motibo pa hubilo? No, pasobra e parlamentario a stop di comenta unda e mester a sigui… Tur hende cu dos placa di conocimento di e materia aki sa cu tin algo cu yama e desequilibrio den distribucion di entrada. Y ta esaki nos ta mira na tanto pais, cu un parti grandi di e riqueza produci ta den man di masha poco hende. E por ta diferente tambe, unda mas hende ta yega na un entrada cu ta permiti nan cria nan famia na un manera aceptable, decente. Tin medicion cientifico pa esaki, e conocido ‘Gini-coefficient’ cu ta duna un impresion con bon o con malo e distribucion di ingreso di un pais ta entre su ciudadanonan. Y den e caso aki nos mester critica e parlamentario aki pasobra e mes sa esaki masha bon y cu na e momento aki na Aruba e recuperacion economico, a pesar di ta en general impresionante, no a yega na tur hende ainda, al contrario… Nos por a scucha esey di e propio ministro encarga cu asunto economico, cu tin e merito di no a warda pa otro hende bin bisa e cos ey y e mes a hacie e siman aki den parlamento, admitiendo cu e recuperacion economico ta bon pero e no a yega na tur ciudadano ainda. “Poder di compra, e salarionan ta kedando atras (compara cu inflacion; red.) y si nos no aborda e centro nos no por drecha e situacion, nos por keda inverti, den inversion di capital, bin cu storia bunita, pero nos tin pa percura pa e posicion di hende bay dilanti y e unico manera pa haci esey ta wak unda e problema ta den nos sociedad, unda e problema ta den nos economia y kico nos mester haci realmente pa nos por bay dilanti,” tabata parti di loke e mandatario a trece dilanti. A pesar cu e parlamentario y e ministro concerni ta di diferente partido, ta poco biaha nos ta tende dos sonido asina diferente for di mesun gobierno. Tin mas tema di discordia, a proposito.

Problema ta keda cu ta e partido di e promer ministro ta esun casi euforico den e dianan aki, ta esun cu ta desea di ignora e situacion dificil cu ta existi pa hopi famia ainda, mientras nos ta mira un testarudez impresionante di nan banda, cu a haci cu pa e prestamo cu Hulanda ta costa nos lo paga mas di 30 miyon florin cu nos tabata mester pa otro cos, mientras nan ta mira solamente e monton di placa extra nan dilanti. Claro cu gobierno y su parlamentarionan den e dianan aki no ta keda sin mustra riba e cambionan fiscal unda entre otro aumenta e limite di entrada bao di cual no ta paga belasting. Esey ta bon pero no por desmenti cu e no ta nada mas cu e triki di ‘duna tiki, pa por cobra mas’. Finalmente e ciudadano ta duna gobieno mas cu e ta haya.

Sin embargo, nos mester puntra nos mes si tabata realmente necesario pa exigi tanto di cartera di e ciudadano, si un plan menos ambicioso tambe lo a duna gobierno suficiente entrada pa cubri e exigencianan financiero cu nan mes y Hulanda a pone riba mesa. Segun nos opinion esey tabata posible pero gobierno tabatin un otro obhetivo acumulando tanto placa. Esun cu ta kere cu tur esaki ta ‘casualidad’ pasobra economia ta fabuloso, ta equiboca. E proyeccion di tanto entrada extra tabata existi algun aña pasa caba, den e proyeccion di varios aña cu ta bin cu cada presupuesto. Es mas, gobierno tin proyecta cu den e proximo cinco aña, te 2028, un entrada cu ta sigui crece te casi 200 miyon florin mas cu na 2023. Naturalmente e tipo di proyeccion aki no ta resulta semper realidad, pero e ta mustra en todo caso con gobierno ta pensa, y algo mas… Segun nos parecer, e plan tabata pa impresiona Hulanda ‘con bon’ e gobierno aki ta goberna, cu tin suficiente placa pa tur cos, te resta y pakico? Pa purba ‘baha e Hulandesnan aki for di nos lomba’… Esey nan no a logra, pero placa tin. Loke si nos por exigi awor anto, ta cu nan di berdad ta atende e problemanan cu nos tin cu no tin nada di haci cu color politico. Den e menos di dos aña cu e gobierno t’ey ainda, laga nan mustra di berdad cu nan sa kico ta goberna, loke ta hopi mas cu ranca placa di e ciudadano. E tarea aki ta conta pa e otronan tambe…