Ayera mainta, studiantenan di e Facultad di Hospitalidad y Turismo di Universidad di Aruba a presenta diferente proyecto cu lo tuma luga den luna di april mirando cu ta e “Global Volunteer Month”.

Jo-Anne Croes, docente di universidad, a splica cu e proyectonan aki ta forma parti di su lesnan di Event Management. E les aki no ta solamente pa studiantenan haya mas conocemento y habilidad, hermentnan cu nan mester pa organisa un evento, sino tambe “pa educa nan curason”.

“Hopi di nos studiante aunke a yega na nivel universitario, nan no a contribui ainda, nan no a fungi como boluntario. Y bo ta bisa como lidernan di industria di Aruba, nan mester tin un compromiso cu e comunidad, duna back na comunidad. Pasobra nan tin e privilegio di atende un universidad, pero e ora ey ta bon pa nan como futuro lidernan nan por tambe compronde kico nan trahadonan ta pasando aden, nan ta crea empatia y bo ta educa no solamente e mente sino tambe e curason di studiantenan cu mañan lo ta nos lidernan den industria aki.” Croes a sigura.

Nuebe studiante a trece dilanti nan proyecto cu ta bay realisa den henter luna di april pa asina nan por yuda diferente fundacion recauda fondo pa sigui duna back na comunidad.

Global Volunteer Month ta un oportunidad unda compania- y organisacionnan sin fin di lucro ta inspira e personanan pa tuma accion di haci bon pa nan comunidad y crea un caminda di compromiso continuo.

Segun Points of Ligths Engage un organisacion global cu ta inspira, ekipa y mobilisa miyones di hende pa tuma medida pa cambia e mundo, tambe ta e centro digital di oportunidadnan di boluntarismo virtual y presencial mas grandi na nivel internacional, den un reciente studio cu nan a haci nan a sigura cu 73% di hende ta kere cu awor mas cu nunca boluntarismo ta hopi importante.

“P’esey ta importante pa duna balor na un boluntario no solamente den deporte, instancianan di hubentud of di bestia, sino cu e trabao di e boluntario mes ta wordo reconoci den e luna aki, cu ta cuminsa 1 di april y ultimo evento di studiantenan ta 30 di april,” Croes a comenta.

Pa e motibo aki, Xyanthe Lacle a bisa cu su grupo ta organisando un evento pa Fundacion Ban Uni Man pa Cria Nos Muchanan, cu tin e nomber di “Ban Uni Man Family Night & Raffle Event.” E evento ta pa recauda fondo pa e fundacion aki, cu ta yuda rond di 800 mucha na 50 diferente scol na Aruba. Nan ta dedica pa traha desayuno pa muchanan di peuterschool, kleuterschool, basischool y tambe na algun cu ta keda na traimerdia.

E evento aki ta bay tuma luga awe 31 di maart na Centro di Bario di Noord for di 6pm te cu 10pm, unda lo tin snacks, co’i bebe, entretenimento en bibo cu Melodia, Level Up Brassband y ademas ta bay bende rifa.

Winson Geerman ta encarga di realisa un evento pa Aruba Donkey Sanctuary, di nomber “Sensational & Saturday.” E evento ta bay tuma luga mañan diasabra for di 11am te cu 3pm na unda na Centro di Bario Playa Pabao. Nan lo recauda fondo, ta bay tin diferente actividad pa mucha y tambe pa hende adulto, ademas di door prizes.

Sharel Croes den representacion di Best Friends Foundation a anuncia cu e fundacion aki a wordo funda na 2021 pa yuda muchanan cu tin rare diseases. Nan evento ta un “Pet Friendly Fun & Walk Run” cu ta bay ta e dia 2 di april for di 4pm te 7pm na Shaba y Frans Figaroa. Akinan e hendenan ta bay cana 5 kilometer cu nan mascota, amigo of famia, unda tin posibilidad pa gana hopi premio.

Michelle Sabajo ken ta representa e grupo di Nine Lives Aruba Foundation a expresa nan evento denomina “Paint & Sip” y ta bay tuma luga na Universidad di Aruba mes e dia 8 di april, den dos orario 10am te cu 1pm y 4pm te 7pm; ademas nan ta bendiendo un rifa, unda tin oportunidad di gana hopi premio, por ehemplo weekend stay na diferente hotel di Aruba, tour cu diferente compania, masashi, breakfast, entre otro.

“Nos ta haciendo e evento aki pa recauda fondo, pero tambe pa trece conscientisacion na nos fundacion. Nine Lives tin e mision di elimina abuso y sobrepoblacion di bestia. Na e momentonan aki nan tin un debe 16.000 florin na veterinario cu nos kier yuda nan pa pag’e mediante e recaudacion aki,” Sabajo a bisa.

Riteshka Chandiramani hunto cu otro colega ta organisando un otro fundraising pa Fundacion Respeta Mi yama “Egg Hunt 4 The Kids.” E fundacion aki ta para contra tur tipo di abuso di mucha y cu esaki nan ta purba di conscientisa comunidad pa preveni tur forma di abuso. Nan evento ta dia 9 di april (diadomingo di Pascua) for di 3pm te cu 5pm na Parke Curason na Jaburibari, e prijs di participacion ta inclui un co’i come y bebe, cu e participacion tambe tin oportunidad di gana diferente premio.

Chantelle Lacle, ken ta representa Koningin Wilhelmina Kankerfonds, a bisa cu nan ta organisando un recaudacion di fondo cu un torneo di bowling y bendemento di rifa yama “Playing for the Lavender Cause” diasabra 15 di april na Centro di Bario Dakota for di 4pm te cu 8pm. Lacle a invita muchanan entre 6 pa 10 aña pa hunga bay bowling di un manera creativo. Cu e ticket di rifa por gana diferente premio, como weekend stay.

Maria Mendoza y su grupo ta organisando un fiesta di nomber “Redemption” na un club nocturno e dia 15 di april for di 11pm te cu 4am pa asina ey yuda e fundacion CrijojoTrappers.

Angelica Castro conhuntamente cu su grupo ta organisando “Furry Friends Fundraising” pa SGT Pepper’s, un rifa cu cual ta duna e oportunidad tambe pa gana diferente premio como dinner na restaurant of un tour pa wak sunset.

Kevin Valderrama ta organisando un evento pa Fundacion Autismo Aruba “Relay for Inclusion” e cual ta bay tuma luga dia 30 di april for di 8am te cu 2pm, un carera unda personanan por crea un grupo di 5 pa participa den esaki, e actividad aki ta wordo acompaña di IBiSA.

Pa participa den algun di eventonan aki, por busca riba red social Facebook e nomber di cada evento pa asina por haya mas informacion.