Mientras nos atencion den e dianan aki ta bay primordialmente na e crisis local nobo di coronavirus, tin otro asunto cu tambe ta exigi nos atencion. Manera e proyecto di renobacion y/o reemplazo di e refineria. Nos por a observa cu tin un interes bastante grandi pa ambos alternativa cu a presenta: o ta renoba e refineria completamente, o ta brinda un alternativa industrial cu por haci uso di e tereno.

Ta remarcable cu tin asina hopi interes pa e promer alternativa, mientras den pasado recien a resulta asina dificil pa logra haya interes di e companianan renombra di e sector petrolero. Di algun nomber di compania cu a entrega documento pa mustra nan interes, nos no por a detecta ningun compania cu ta pertenece directamente na e sector petrolero, mucho menos compania bon estableci y di renombre den e sector. Y pakico esey ta importante? Pasobra esaki ta un di e sectornan mihor desaroya na nivel mundial, unda ta traha cu capital enorme, unda ta papia biyones envez di miyones. Den e sector aki ta dificil pa mantene un posicion fuerte si un compania no tin su propio suministro di materia prima, pa por controla abastecimento y prijs.

Esey ta mihor sigura si un compania tin su propio actividad ‘upstream’ (exploracion y produccion di crudo) pa abastece su propio actividad ‘downstream’ (refinacion y distribucion). Nos tabatin experiencia na Aruba caba cu un compania cu tabatin cierto posicion fuerte na Merca como refinador, pero cu no tabata dispone di su mesun actividad upstream: Valero. Nan problemanan pa mantene un supply continuo di un empresa asina aleha di nan ‘core business’ na Merca a resulta un dado momento insostenible. Ademas, e refineria na Aruba tabata produci solamente producto intermedio cu tabata requeri procesamento final na e refinerianan na Merca: doble gasto di proceso y di transportacion.

Cu e companianan grandi mundial for di horizonte pa tuma e refineria na Aruba, nos ta bin cay automaticamente den e categoria di ‘chance takers’ cu no ta den e negoshi di refina directamente. Esey a sucede tambe recientemente na Curaçao unda Klesch Group a logra gana confianza di gobierno di e isla, mas basa riba desesperacion cu cualkier otro cos, mientras e compania tabatin un refineria chikito na Alemania, pero ta primordialmente orienta riba compra y benta di producto petrolero. Esey inmediatamente ta trece e interogante si e tipo di compania aki tin e magnitud financiero pa ehecuta proyecto biyonario di e tipo aki, tambe pa por reuni e capital necesario pa esaki. Despues a bin ademas e crisis di Covid-19 cu a pone fin na e aventura. Mester bisa acerca cu promer cu e coronacrisis ya caba Klesch a haya ‘nul op het rekest’ di gobierno di Trinidad & Tobago, unda nan kier a tuma over e refineria na Trinidad, tambe paralisa sin futuro. Klesch no por a mustra capacidad financiero pa ta un candidato serio na e pais ey.

Kico nos kier bisa cu esaki? Cu nos no tin motibo pa laga compania aventurero kita nos vista for di loke si ta factible den e tempo aki, unda ademas e mercado mundial di petroleo a keda reduci considerablemente, y hasta ta posible cu e mercado petrolero no lo bolbe mas na e volumen cu e tabatin promer cu e crisis. Anto lo no tin mester di tanto capacidad di refinacion, mucho menos den region di Caribe. Cu otro palabra, segun nos opinion e opcion di renoba e refineria ta mas bien pa kita critica di oposicion for di caminda, cu ainda tin algun persona enamora di e idea di renoba e refineria, a pesar di e catastrofe cu Citgo.

Ta keda nos anto pa busca algo diferente? Sigur, pero den esey por tin un eror cu nos no mester comete. Alternativa renovable pa produccion di energia pa consumo local no necesariamente ta reemplaza e refineria, pasobra esaki ta basa riba exportacion di producto y por lo tanto semper tabata un contribuyente fuerte di divisa cu a duna nos e posicion stabil di nos moneda. Ora nos produci energia di otro forma, esaki por reemplaza e produccion cu heavy fuel oil, loke ta bon, pero no ta kita e necesidad di un sistema di back up cu necesariamente ta basa riba algun forma di energia di combustible fosil. Esaki por ta gas natural, cu ta kima cu menos contaminacion cu heavy fuel oil, pero como un sistema ‘stand alone’ nos no por haya ayudo di otro lugar ora tin un fayo grandi den e sistema. Pues den evaluacion di tur esnan cu ta bin presenta nan proyecto – bonbini – pero un di e preguntanan cardinal lo ta kico nan ta contribui na gana divisa pa nos pais. Esaki por sucede a traves di reduci importacion di fuel oil, o directamente via un producto cu ta exporta. Proyecto cu ta pone presion pisa riba nos divisanan, sin cu tin un componente fuerte di inversion stranhero, cu ta trece divisa fresco na e pais, realmente no ta bay yuda nos tanto den e situacion cu nos ta awor. Problema ta cu pa via di e acostumbrado secrecia alrededor di e tipo di asunto aki, nos no ta sigura di e sano huicio cu mester ta presente den esaki. Loke a pasa na Curaçao cu Klesch recientemente ta mal ehemplo.