Cu o sin migrante… Vivienda pa ningun hende…

En general nos ta keda mantene nos opinion cu debate electoral mas tanto no ta haci hopi diferencia den cambia opinion di hende, pero si por duna un aporte bon na informacion di publico. Den e debate di diamars anochi por a mira un nivel bastante bon di informacion como introduccion di e temanan, pero esaki no necesariamente a hiba nos na un contesta satisfactorio di e politiconan participante, cu ta duna mas claridad riba trasfondo di e problematica. Den cierto caso tambe e formula cu a scoge a obliga e participantenan na duna un contesta cortico y cla, pero lagando e tema mes sin mas splicacion. Por ehemplo, a puntra e partidonan si nan ta opina, encuanto e problema di e grupo grandi di persona indocumenta (20.000), cu mester sea legaliza o expulsa nan. Practicamente tur partido a contesta cu nan ta opta pa legaliza nan, loke en todo caso a trece claridad den e asunto aki, unda pa basta tempo hasta gobierno tabata keda keto, cu excepcion di e ministro encarga cu labor y integracion, cu tabata indica un disposcion pa cuminza legaliza estadia di e personanan aki via integracion den mercado laboral formal. E ministro ey a desaparece for di escenario politico y un rapport di Amnesty International tocante e trato, supuestamente deficiente di refugiado na Aruba a drenta publicidad te bay, sin cu realmente nos a haya mitar palabra di gobierno encuanto kico ta bay haci. Ta bon anto di tende di e lider di e partido mayor den e actual coalicion cu e ta na fabor di legaliza e grupo aki y cu ademas practicamente tur partido ta di acuerdo cu esaki.

Sin embargo, esey ainda ta laga e pregunta kico exactamente ta comprende bao di ‘integracion’ di e grupo aki. De vez en cuando nos ta tende observacion cu ta indica cu nan mester siña e idioma local, cu nan mester siña conoce nos cultura local, etc. Mester bisa cu algun aña pasa a introduci e concepto (Hulandes) aki, di preocupacion cu un grupo di stranhero asina grandi ta cuminza afecta nos sociedad na diferente manera. Esey por parce algo logico pero ta importante constata cu nunca antes, mientras nos tabatin dos ola migratorio grandi den siglo pasa, nos gobierno(nan) tabata preocupa pa e tipo di influencia aki. Y nos no ta bisa esey den sentido negativo; henter nos comunidad tabata acepta como un hecho cu tanto migrante ta yega aki y ta busca nan caminda. Y e actitud positivo di e partidonan pa acepta legalizacion di e grupo actual di migrante indocumenta ta mustra atrobe den e direccion ey. Pregunta anto: nos realmente mester un concepto – importa – di exigi ‘integracion’ di e stranhero cu a bin radica aki, pa cumpli cu cual meta? Por ta cu mientras tanto si tin di nos cu a cuminza bira nervioso pa e impacto cu un grupo asina grandi – tin mas pa bin – lo tin riba nos comunidad? Si esey ta e caso, anto nan ta basta laat pa bay pensa esey awor, pasobra nos ta bayendo caba den mas di 50% di nos poblacion naci den exterior. Pa hopi aña caba anualmente e grupo naci na Aruba cu ta emigra ta hopi mas grandi cu e grupo cu ta bolbe. E grupo di persona di otro nacionalidad cu ta drenta cada aña ta hopi mas grandi cu e grupo cu ta sali di nos pais, causando cu gradualmente e porcentahe di hende no naci na Aruba ta sigui crece. E perspectiva pa e proximo añanan ta cu e proceso ey lo intensifica mas. Awor, esey ta e problema cardinal, cu e hendenan ey no ta ‘integra’? Honestamente, nos ta kere cu e problema cardinal ta cu te awe nos gobierno(nan) no ta prepara pa duna cara y bin cu solucion pa e problemanan grandi cu un fluho fuerte di migracion ta causa. Por ehemplo, e escasez preocupante di vivienda, y especialmente vivienda pa e grupo mayoritario cu no tin e recursonan pa financia y traha nan propio cas. Nos por ripara cada vez atrobe cu ora ta papia di vivienda, mesora e discusion ta bay den direccion di e falta di tereno pa traha cas. Por fabor, e gran mayoria di nos poblacion, Arubano di pura cepa, o migrante di hopi o tiki aña, ningun tin e recursonan financiero pa yuda nan mes. Pues vivienda popular lo mester ta tema principal pa cualkier partido; pero esey ta asina? Pa cuminza nos tin un partido mayoritario den ultimo dos gabinete di coalicion cu, si nos no ta hera, ultimamente a bin cu un proyecto di apartamento di luho pa hende di e grupo pudiente cu por haya financiamento pa un prestamo di 350.000 florin, nada mas. Ta cuanto hende tin e tipo di salario ey pa por haya un hipoteca asina? Si e situacion di vivienda ta asina urgente caba, con esey lo mester bira ora lo tin mas migrante ta pone pia na tera aki, manera tur cos ta mustra pa e proximo añanan?

Nos por constata cu, a pesar cu gobierno tabatin un ministerio di ‘integracion’, no a yega nunca na defini kico esey ta encera. Esey no ta parce nos asina relevante tampoco, mas grave ta cu gobierno(nan) no a percura, ni ta parce dispuesto pa bin cu un berdadero plan pa atende vivienda popular, pa henter e grupo mayoritario di poco recurso. Gobierno no ta cumpli cu un di e tareanan mas basico di cualkier gobernacion, y pa colmo oposicion no ta parce capaz pa critica esey? T’ey nos ta awe.