Ayera minister di Asuntonan Social y Husticia Rocco Tjon hunto cu Cuerpo Policial di Aruba a anuncia cu nan lo introduci e aplicacion ‘ACTPOL’ cu a wordo crea conhuntamente cu Stichting Beheer ICT Rechtshandhaving y ACTS.
Minister Tjon a expresa cu esaki ta un momento hopi importante den cual informacion ta bay wordo usa mas miho y ta bay bira mas accesibel pa tur polis cu ta traha riba caya, e aplicacion aki tin dos funcion na unda cu na un banda e agente policial aworaki a traves di smartphone cu nan lo haya nan lo tin acceso na tur informacion.
El a pone como por ehemplo si polis kier controla un auto, a traves di e aplicacion aki, nan mes por haci e control y no ta depende mas di un central meld, di otro banda el a señala cu tambe tin otro funcionalidad na unda cu ora polis lo bay duna asistencia tambe nan lo haya tur informacion necesario pa por atende cu e asistencia hopi mas sigur pa nan mes como agentenan di polis.
Nan por haya por ehemplo e historia di un adres cu nan ta bay bishita por medio di e aplicacion aki, “mi ta kere esaki ta un stap hopi importante den cuadro di usa informacion y inteligencia mas miho pa bo por combati criminalidad, pero kico mi ta haya mas importante ainda ta cu a traves di e app aki e ta bira posibel tambe cu por eleva e siguridad di cada colega cu ta haci nan trabou riba caya”, minister Tjon a sigura.
Asina mes, el a indica cu esaki ta un proyecto piloto na unda cu for di e dianan aki te cu tres luna tur polis cu lo haci uso di e aplicacion aki por duna un feedback pa asina e version aki lo wordo adapta y despues lo haya e version final.
Minister Tjon a informa tambe cu den e prome kwartaal di otro aña nan lo cuminsa cu un otro proyecto piloto caminda lo introduci e ETA mobil data terminals cu lo wordo instala den autonan di polis y di e forma aki el a ripiti cu e informacion lo bira mas accesibel y cu lo brinda un miho servicio na comunidad di Aruba.
Di su parti, Cleotis Chong di ACTS cu a traha conhuntamente cu Stichting Beheer ICT Rechtshandhaving pa loke ta trata e aplicacion a conta cu ora polis ta haci su trabou di asistencia lo tin e informacion, e telefonnan aki ta hopi sigur segun loke Chong a menciona, na unda el a splica cu nan tin nan pin code cu mester conecta na un VPN, cu polis solamente por traha cune y si algo lo pasa y telefon perde nan por wipe al instante.
E proyecto piloto aki lo cuminsa awe na unda nan a cuminsa conscientisa nan coleganan via un korps mededeling y nan ta bay haya instruccionnan tambe con y kico nan mester haci.
Irma Gordon cu ta waarnemend korpschef actualmente a bisa cu esaki ta un proyecto innovativo cu nan ta bezig cune door cu nan tambe tin relacionnan cu otro cuerponan di siguridad den area di Caribe y aworaki cu nan lo cuminsa cu e proyecto nobo aki na unda cu lo yuda nan den futuro pa nan por ta mas prepara ora nan ta bay haci un asistencia.
“E ta yuda e coleganan tambe pa nan sa kico nan por verwacht ora nan ta bay un luga y pa den futuro, otro kwartaal nan lo por ta mas informa di loke nos ta na e momentonan aki” Gordon a declara.
Asina mes, Gordon a declara cu nan ta espera cu e device aki cu ta bay facilita nan trabou pa nan por yega na informacion mas lihe posibel cu den futuro ora nan lo bay den e laptop cu patruyanan tin esey y sigur lo yuda nan haci nan trabou un tiki mas miho.
Na e momentonan aki, nan tin 15 device cu lo wordo reparti entre e diferente districtonan pa asina e funcionarionan di polis por cuminsa traha cu nan, ademas el a informa cu central melding kamer tambe por comunica cu polis sin cu e melding mester bay via portofon manera e proceso tradicional ta.
Pa loke ta trata renobacion di autonan di polis, minister Tjon a bisa cu ora ta asina leu cu contractnan lo crea un comision di Cuerpo di Polis cu ta bay duna un conseho riba ki tipo di auto ta desea pa renoba, teniendo na cuenta diferente funcion pero un parti hopi importante ta e realidad financiero cu nan ta bibando na e momentonan aki, “na su debido tempo ora nos lo haya conseho for di cuerpo policial mes, e comision lo dicidi e ora ki decision lo wordo tuma”, el a bisa.
Di mesun manera, a trece dilanti e parti di bodycam na unda cu minister Tjon a sigura cu tin hopi investigacion cu a wordo haci riba esaki na otro paisnan como Merca y tambe na Europa segun el a señala, “e tin su hopi bentaha, prome cu bo lo kier introduci algo asina mi ta kere ta na su luga pa bo hiba un bon combersacion cu halto mando pero tambe cu sindicato di polis pa asina palabra bon pa ki meta e final e bodycam aki ta wordo usa, e por eleva siguridad, e por trece claridad tambe na momento cu tin un incidente of si tin un keho di un agente policial por ehemplo, na unda mester wak e parti legislativo y e parti di e maneho, pero e ta sigur un proyecto cu lo ta di balor agrega pero na su debido tempo e combersacion aki lo wordo hiba cu halto mando y sindicato di polis”, el a comenta.
