Holiendo vapor di matanan medicinal, casi 2.000 indjan Amazonico na Lima ta lucha contra un pandemia cu a laga centenares di hende malo y tres morto entre nan, ademas di kita nan entrada.
Na comunidad ‘Cantagallo’, na pia di sero San Cristobal di e capital Peruano, 300 famia di etnia Shipibo Conibo ta biba, kendenan a scapa di e violencia guerrillero di e selva tres decada atras.
Cu 33 miyon habitante, Peru ta registra 244.388 caso confirma di coronavirus (casi mesun cifra cu Spaña) y 7.461 morto. E pais Andino ta di dos na Latino America den casonan di Covid-19 tras di Brasil y di tres cu e cifra di fayecidonan, despues di Mexico.
E comunidad ‘Cantagallo’ tabata bou cuarentena obligatorio na final di mei, cu vigilancia di Ehercito y Polis, despues cu 475 persona di e poblacion a sali positivo pa coronavirus.
E hendenan malo pa coronavirus ‘no por ni hala rosea y esey tabata hopi preocupante pa nos, nos tabata desespera, hopi teribel. Nos a pasa un situacion hopi critico den e dos siman ey’, Inuma, di 34 aña di edad, a expresa.
E hendenan di e poblacion ta hole vapor di infusion di eucalyptus, ginger, siboyo y lamunchi herbi den weanan. Nan ta hacie via un ritual, cu canticanan tradicional y huma tabaco preto.
Pero nan recetanan natural y rogamento no a impedi cu hopi hende di e poblacion di Cantagallo a haya e coronavirus. Tres persona a muri y otro 20 di nan ta grave, segun autoridadnan.
