(Reuters) – Ayera diaranson, Colombia a habri back e fronteranan cu Venezuela despues di un ciere di mas di 14 luna como parti di esfuersonan pa contene e pandemia di Covid-19, aunke e transito lo wordo haci di manera gradual y cu algun restriccionnan, Gobierno a informa.
E pais sur Americano di 50 miyon habitante a cera su frontera desde 17 di maart di 2020, ora pandemia a cuminsa.
Un resolucion di Ministerio di Interior ta autorisa “apertura gradual di e pasonan terestre y fluvial di e frontera cu Republica Bolivariano di Venezuela, for di 12or di marduga di dia 2 di juni, sin perhuicio cu lo sigui aplica e medidanan di bio-siguridad estableci pa Ministerio di Salud y Proteccion Social”.
Autoridad di Migracion di Colombia a anuncia cu lo tin orarionan y lo establece restriccionnan di entrada di acuerdo cu e ultimo number di documento di identidad di e personanan.
Di banda Venezolano, na unda ainda tin un ciere di frontera, e prefecto di e localidad di Ureña, Urley Moreno, a bisa cu militarnan a forsa e blokeo pa acceso na e brugnan di e frontera.
El a agrega cu por ehempel na brug internacional Francisco di Paula Santander, cu ta uni Ureña cu e ciudad Colombiano di Cucuta, e funcionarionan militar a coloca un “muraya grandi” of panelnan mobil, pa evita aglomeracion di hende cu ta purba di crusa.
Sinembargo, diaranson mainta no tabatin acumulacion di hende pa pasa pa Colombia via e brugnan, den e cual di banda Venezolano tin poni containernan grandi pa evita e paso. E migrantenan ta sigui usa e trocha of paso informal, pa yega na teritorio di e pais bisiña, e prefecto a agrega.
Colombia ta e destino principal di emigrantenan Venezolano cu ta huy for di e crisis social y economico di e nacion petrolero.
Actualmente, mas di 1.7 miyon di Venezolano ta biba na Colombia, un cifra cu por aumenta den proximo lunanan cu e decision di e Gobierno di presidente Ivan Duque di duna nan un statuut di proteccion temporal pa 10 aña.
