Diasabra ultimo a tuma lugar e Fakkel optocht, of Parada di Flambeu, na Oranjestad. Cuminsando pa 8or di anochi, e parada a sali for di Avenida Milio Croes y a caba na Paardenbaaistraat.

Noticieronan local a reporta cu e parada a conta cu mas di 9mil participante, reparti entre nuebe grupo.

E secuencia di grupo tabata: grupo uno TOB Carnival Group; grupo dos Los Laga Bai Carnival Group; grupo tres Champagne Carnival Group; grupo cuater Colours Carnival Group; grupo cinco Dushi Carnival Group; grupo seis Aruba Tourist Carnival Group; grupo siete OPC Carnival Group; grupo ocho Empire Carnival Group; y grupo nuebe Royal Carnival Group.

Cero detencion

Cuerpo Policial a informa cu e parada a sali diasabra anochi pa exactamente 8:01pm, y e cabes a yega ex-DOW pa 00:20, y pa 2:55 di mainta, e final di e parada a yega.

Pa loke ta trata polis, agentenan di diferente departamento a traha e anochi en cuestion.

Polis uniforma, K-9, ME, AT, recherche, personal administrativo, commando mobiel, Motor Unit y personal di CEA.

Loke a resalta ta cu e aña aki, no tabatin ningun detencion durante e parada. Aña pasa, e parada di Flambeu a conta cu ocho detencion, segun polis a informa.

Auto coriendo bao influencia

A pesar cu no a detene ningun persona den e parada, si tabatin detencion di chauffeur coriendo bao influencia.

Departamento di Trafico y Unidad Motorisa a haci control prome durante y despues di Parada di Flambeu.

Departamento di Trafico a controla na comienso di e Parada di Flambeu pa loke ta trata e papelnan di auto como tambe rijbewijs valido.

Unidad Motorisa a haci controla na diferente camindanan strategico durante parada.

En total a detene 8 chauffeur pa maneha bao di influencia di alcohol, di cual 3 a perde nan rijbewijs.

Aña 2024 a conta cu 11 detencion pa loke ta maneha bao influencia di alcohol. Dus un rebaho tambe pa loke ta control despues di parada di Flambeu .

Controlanan lo continua durante e otro paradanan nos dilanti.

Cuerpo Policial ta haci un apelacion un biaha mas pa no maneha auto bao influencia di alcohol. Usa Bo Amigo Responsabel.