Cu introduccion di IparkMe, e lo ta posibel pa haci pagonan na Aruparking via telefon celular. Lo bay tin e facilidad aki entrante 8 di juli. Esaki lo ta beneficioso pa hopi como cu no mester bay recarga bek te na e mashin, y por haci esey unda cu ta via telefon. E App ta costa 3$ pa luna, por recarga via Paypal, Credit Card of oficina di Aruparking. E minimo cu por recarga cun’e ta 10 $. Y e minimo cu por paga pe ta 2 florin pa 1ora y mey pero por extende esaki pa e minimo di 3 minuut mes si mester.
Retonan Aruparking
Teo Croes director di Aruparking a splica durante e conferencia di IParkMe, di algun reto cu Aruparking tin actualmente. Sa tin diferente caso di hendenan cu ta para den un vak y pa un of otro motibo ta marca number robes. El a splica: “E casonan cu tin por ehempel di paramento den vak robes,no ta wordo sanciona. E auto ta wordo geklem e momento ey, pero si e mustra e oficialnan di Aruparking cu el a para den vak robes, e klem ta wordo kita sin costo. E otro casonan cu ta haya ta, cu enbes di marca number “0” nan ta hinca letter “O”. Esaki ta pasa cu letter “I” tambe cu ta wordo confundi, cual segun Sr. Croes e tipo di cosnan ey lo wordo elimina, pues lo stop di uza e letternan ey e ora cual lo elimina e problema ey tambe.” Pa loke ta e problemanan di comunicacion cu Aruparking sa experiencia, el a splica cu esey no ta algo cu ta pasa tur ora y tambe cu e Ipad nan cu e parkeerwachter nan ta cana cun’e ta “linked” cu henter e sistema. Hopi ta e personanan cu ta keda critica cu e ta caro pa paga pa parkeer, sinembargo Sr. Croes ta uza ehempel di Merca, pa mustra con barata ta na Aruba, y cu nos sistema ta un di esunnan mas barata cu tin, cu esaki e ta inclui e prijs pa ora, multa y towing.
Cifranan
Pa loke ta e transaccionnan di Aruparking siman pasa, e director ta bisa cu cifranan ta mustra cu e cantidad a aumenta cu 3000, compara cu e siman prome y e luna prome na e mesun fecha.
“Aworaki tin un campaña pa promove caya grandi, pasobra si nan t’ey nos t’ey, e mester ta un situacion cu tur hende ta gana.” Pa loke ta e ocupacion di e area pabou, ta consciente cu e ta hopi yen tur ora y ta purbando na cambia cierto cosnan pa alivia e situacion mas, Sr. Croes a agrega.
60000 transaccion luna pasa
Awendia unda cu bo bay, semper tin dianan cu bo no ta haya niun hende ta haci compras, pero riba un bon diasabra trankil bo por saca 6000 – 7000 transaccion asina bo tin un 60000 transaccion facil, e director ta enfatisa. Esaki ta cu un cifra promedio di e luna cu a pasa, e luna aki e cantidad ta mas halto.
Marvin Maduro IT Aruparking
“E App ta cla caba cual ta haci cu pa dia 8 di juli e ta disponibel pa tur hende download. E App ta simpel, e ta djis tres boton. Inicialmente bo mester registra bo number di auto, despues bo ta primi pa “park”, “un-park” of “recharge”. Pa paga por scoge via Paypal, credit card of na oficina di Aruparking, ta primi pa paga, selecta e zona y confirma e zona. Manera menciona anterior inicialmente ora cu ta bay parkeer ta 2 florin pero despues bo por keda recarga cuanto biaha cu bo kier cuminsando for di 3 min.” Un beneficio grandi di e App ta, cu e ta duna bo placa bek segun Sr. Maduro ta splica. Pues si bo a paga pa 5 ora pero bo a uza 1 ora so, ora bo yega bek na bo auto, bo por marca “un-park” e ta na bo e cen bek pasobra bo no a uz’e. Pero mester corda “un- park”. E App di su mes tambe ta duna bo informacion cu bo tempo ta bay caduca. Actualmente tur e informacion di e App ta na Ingles. Y e suma cu yena di placa den e App no ta caduca, e ta “roll-over”.
Channela Maldonado
“Aruparking kier traha hunto cu comercio pa asina bin mas cliente den caya grandi, pa asina haci nos caya grandi mas grandi. Aruparking a cuminsa cu un campaña di Back to School cu lo cuminsa dia 1 di juli. Hopi comerciante ya ta forma parti di e campaña aki y e ta encera cu si un cliente cumpra algun producto den e tienda di un suma di 35 florin, e cliente lo paga 34 florin. Asina tambe si un hende cumpra un producto cu ta sali 50 florin, nan ta paga 48 florin. Y si nan surpasa 100 florin, nan ta bin cu e recibo na Aruparking y nan ta haya un smartcard gratis cu 10florin cu nan por sigui uza pa parkeer ora di haci compras den futuro.” Segun Sra. Maldonando e campaña no tin ningun costo adicional pa e comerciante, pues ningun promocion na radio, corant, jingle etc. Tin mas cu 25 comerciante cu a join caba, ta start 1 di juli cu e campaña pero comerciantenan lo tin e posibilidad pa join despues di e fecha aki si nan kier. Tur comerciante a haya carta, Sra. Maldonado a termina bisando.
