Cu intermediacion di Mediador di Gobierno: Citgo Aruba y FTA a discuti punto di diferencia

Ayera departamento di Mediador di Gobierno tabata activo tambe dunando su intermediacion, despues cu e trahadonan di staf na servicio di Citgo Aruba Refinery (CAR) y afilia na sindicato FTA a intensifica nan accion.

Mediador di Gobierno, Anselmo Pontilius a bisa cu nan a convoca un reunion ayera mainta den nan sede, despues cu a keda informa publicamente cu e trahadonan aki tabata determina pa bay intensifica nan accion morocoy y bay mas fuerte. Nan a logra haya e partidonan ayera pa 10or di mainta, ora den cual hunto cu Citgo y dirigentenan di FTA, nan a discuti e puntonan di diferencia cu tin riba mesa.

Manera ta conoci, tur e trahadonan y nan respectivo sindicato, FTA y IOWU, sin excepcion a rechasa e oferta of pakete cu Citgo a pone ariba mesa dia 27 di december ultimo. Den e carta cu Citgo a manda, nan a ofrece pa paga tur trahadonan nan añanan di servicio di acuerdo cu e leynan di cesantia, mas dos luna di compensacion y nan dianan di vakantie, etc.

“E no ta nada otro di loke bo mester paga obligatoriamente na momento cu bo ta termina e relacion di trabou”, Pontilius a declara. Mientras cu e trahadonan y nan sindicatonan ta exigi un pago igual di nan ex coleganan cu a wordo termina cu Citgo na januari y februari 2019.

Den e reunion di ayera, Citgo a enfatisa un biaha mas cu nan ta pagando un pakete menos di loke nan a yega di paga caba den pasado, debi cu nan ta argumenta cu nan no tin e fondonan disponibel. Sigur mirando cu tur e lunanan cu a transcuri nan no tabatin entrada, sino cu nan tabatin mas gasto.

Mediador di Gobierno ta considera importante cu gobierno finalmente hunto cu e compania Refineria di Aruba (RdA) y su hunta di comisario a reuni cu IOWUA ayera tardi y nan ta bay reuni awe cu FTA.

Den e reunionnan aki nan lo bay tende kende of cual compania eventualmente ta esun encarga pa sigui cu e operacion den e refineria y terminal di combustibel, si Citgo ta stop fin di luna aki manera nan a yega di anuncia caba. Tin un acuerdo di suspension entre Citgo y RdA cu ainda no a wordo firma, pero cu nan ta considera cu ta basta cerca pa firma e acuerdo aki.