Departamento Recurso Humano, DRH recientemente a introduci iniciativanan innovativo cu ta enfoca riba modernisacion di forsa laboral den sector publico y departamentonan di Gobierno.
Decreto nacional di evaluacion di prestacion di trabao di gobierno (AB2022 No. 165) a drenta na vigor dia 1 di januari 2023, introduciendo Prestatiemanagement, un practica hopi conoci y usual den sector priva y awor tambe den sector publico. E paso aki ta marca un avance significante pa crea un ambiente di trabao transparente y motivante pa tur empleado di Gobierno.
Contrario na algun conceptonan robes circulando den media, Prestatiemanagement ta brinda e trahado publico un sistema cu ta sostene dialogo abierto y constructivo, caminda cu e trahado publico ta ricibi aprecio di esfuerso y progreso. E maneho aki ta basa riba e peticionnan di trahadonan publico cu kier mira un sistema husto y transparente cu ta stimula y motiva tur trahado publico cu ta duna e miho di nan mes indicando e puntonan di mehoracion y puntonan fuerte den e diferente momento di combersacion. DRH ta sostene e importancia di aprecia y reconoce prestacionnan sobresaliente, y e maneho aki ta busca pa inspira empleadonan den nan trabao pa brinda servicionan excepcional na comunidad y entre departamentonan interno di Gobierno.
Pa sostene e desaroyo, DRH a presenta su HR-portaal, un website cu tin informacion importante pa trahado di Land, cu ta mehora comunicacion entre departamentonan di Gobierno y tur trahado publico. Pa medio di e HR-portaal, e trahado por mantene su mes informa tocante reglanan, noticia y desaroyonan di mas reciente.
Tambe, DRH a lansa su plataforma digital di educacion cu ta yama Land Aruba Academy. Den luna di Mei, e plataforma a ser introduci cu exito. Uso di e plataforma ta gratis pa tur trahando den Gobierno. Tur trahado publico cu a registra, awor tin acceso na un coleccion amplio di mas di 700 curso, webinar, masterclass, y articulonan personalisa na e necesidad di cada profesional. E obhetivo ta pa duna e trahadonan publico e capacidad pa continua desaroyo di nan habilidadnan y adkeri conocementonan nobo sin ningun costo. Pronto lo sigui cu mas proyecto (entre otro workshops) pa enfoca riba conocemento y desaroyo pa formacion di e trahado publico.
E iniciativanan aki ta demostra e dedicacion profundo di Gobierno pa modernisa e practicanan di maneho y brinda e hermentnan necesario pa e desaroyo personal y profesional di cada trahado publico.
E meta final ta pa logra un forsa laboral mas fuerte, mas transparente y motiva, cu ta beneficia tanto e trahado mes como e comunidad.
