Un keho cu Departamento di Impuesto a bin ta hayando tin di haber cu 60 mil Florin riba e balor di e propiedad, cu a disparce den e cambionan cu a keda introduci den e ley di grondbelasting.

Tin contribuyente cu a sinti cu esaki a trece cune cu e beneficio pa hopi propiedad ta casi nada. Anteriormente, un propiedad di 250 mil florin tabata paga 4% di 250 mil menos 60 mil, e tabata 190 mil florin. Cu e cambio introduci, awor e ta paga 3% di 250 mil sin kita e 60 mil, e diferencia a bira basicamente 100 florin menos.

Directora di departamento di impuesto, Luenne Gomez-Pieters a laga sa cu den e ley bieu tabata wordo conoci un suma di dispensacion di 60 mil florin, ora cu nan tabata haci calculacion pa cobra impuesto riba propiedad inmobil. Tambe tabata existi un tarifa di 0.4%.

E cambio cu a sosode entrante e aña aki ta cu a introduci un obligacion pa haci declaracion. Igualmente a elimina e suma di dispensacion di 60 mil florin. E echo cu nan a elimina e suma di dispensacion, esaki a nifica un aumento di 1.200 contribuyente cu no mester paga e tipo di belasting aki compara cu aña 2018, el a bisa.

Un keho riba eliminacion di e suma di dispensacion di 60 mil florin tin di haber cu e contribuyente ta trece dilanti cu e balor di su propiedad a cambia. El a tilda esaki como simplemente un bruhamento, ya cu balor di un propiedad por wordo ahusta –segun ley di grondbelasting– un bes cada 5 aña. Aunke durante e ultimo 10 añanan, departamento di impuesto no a ahusta e balor di e propiedadnan, ya caba otro aña nos ta den e termino di 5 aña pa ahusta e balor di e propiedad.

Directora di e departamento aki a laga sa cu na 2021 ta bira e aña cu nan ta bay revisa full e balor di cada propiedad, y esaki ta depende di e prijs riba mercado. Ya cu grondbelasting tin di haber cu e balor di e propiedad, teniendo na cuenta e material cu cual el a wordo construi. E factornan aki –segun Gomez-Pieters– tin un impacto ariba e balor di bo cas. Logicamente tur decision ta wordo consulta cu e minister concerni, y si gobierno ta bay haci un ahuste masal di e balor di e propiedad.

Gobierno a introduci un sistema di tarifa cu diferente categorisacion, cu ta depende di e balor di e propiedad; y tambe a introduci un tarifa proporcional, cu ta valido pa no residentenan y propiedad comercial. E tarifa di grondbelasting ta ariba parcela, y no ta papia necesariamente di un cas.

Si un persona tin un parcela cu un balor entre cero y 120 mil florin, no ta paga grondbelasting. Un parcela of propiedad cu tin un balor di 120 mil pa 250 mil florin, e tarifa a baha na 0.2%. Un propiedad di un balor entre 250 mil te cu 500 mil florin e tarifa ta 0.3%. Un propiedad pa balor di 500 mil te cu 750 mil florin, e tarifa ta 0.4%. Tur propiedad ariba un balor di 750 mil florin, e tarifa a subi na 0.6% .