(AP) – Presidente Ruso, Vladimir Putin a bisa despues di extende su presidencia den un eleccion cu a sofoca oposicion, cu Moscu no ta bay cede den su invasion di Ucrania, y tin plan pa crea un ‘buffer zone’ pa yuda protege contra atakenan Ucraniano di rango largo y atakenan crusando e frontera.
Forsanan di Kremlin a haci progreso den bataya mientras e trupanan di Kyiv ta lucha cu un escasez severo di proyectil di artileria y unidadnan exhausto den linea frontal despues di mas cu dos decada di guera. E linea frontal ta stretch como mil kilometer den sur y oriente di Ucrania. Avancenan ta costoso y slow, y Ucrania a usa cada bes mas su poder di rango largo pa dal refinerianan y almacenahe di azeta den profundidad di Rusia. Ademas, gruponan cu ta bisa di ta oponentenan Ruso di e Kremlin basa na Ucrania a lansa incursionnan door di e frontera.
“Nos ta bay ta forsa, na dado momento, ora nos considera necesario, pa crea un cierto ‘zona sanitario’ den e teritorionan controla pa (gobierno Ucraniano)”, Putin a bisa ayera. El a bisa cu e ‘zona di seguridad’ aki “lo ta dificil pa penetra usando e activonan di atake fabrica pa stranheronan na disposicion di e enemigo.”
El a papia despues di publicacion di resultadonan di eleccion cu a mustr’e sigurando un di seis termino, den un victoria aplastante den un eleccion priva di cualkier oposicion real despues di su atakenan implacable contra disidencia.
Awe ta marca e di 10 aniversario di e toma di Peninsula Crimea di Ucrania pa Rusia, cu a prepara escenario pa Rusia invadi su bisiña na februari di 2022. Sinembargo, Putin impreciso tocante su metanan na Ucrania desde cu e invasion a gran escala a fracasa.
Putin a adverti Occidente contra manda trupa na Ucrania. Un posible conflicto entre Rusia y NATO lo pone mundo “un stap leu” di un Tercera Guera Mundial, el a bisa.
Presidente Frances, Emmanuel Macron recientemente a bisa cu no mester descarta manda trupa Occidental den Ucrania, maske el a bisa cu e situacion actual no ta rekeri esaki.
Comentando riba e prospecto di negociacionnan di paz cu Kyiv, Putin a reafirma cu Rusia ta keda abierto pa negociacion pero no lo bay pa un tregua cu lo permiti Ucrania rearma.
Sinembargo, presidente Ucraniano, Volodymyr Zelenskyy aparentemente a cera porta riba negociacionnan asina, bisando cu mester hiba Putin na huicio den Corte Criminal Internacional na Den Haag, cual aña pasa a emiti un orden di aresto pa Putin pa crimen di guera.
Cu ayudo crucial reteni na Washington, senador Mericano, Lindsey Graham a yega Kyiv dialuna, embahada Mericano a bisa. Ucrania desesperadamente mester di e alrededor di $48 biyon cu e pakete di sosten lo provee, specialmente proyectil di artileria y sistemanan di defensa aereo.
Forsa aereo Ucraniano a bisa cu a intercepta 17 di 22 drone lansa pa Rusia riba varios region di e pais den anochi. Rusia tambe a lansa misil S-300 y S-400 na region Kharkiv y dos Kh-59 na region Sumi, ambos den nort oriente di Ucrania, a bisa.
Autoridadnan ta bisa cu e intensidad di atake aereo y terestre a aumenta recientemente den region Sumy, impulsando evacuacion di 56 persona incluyendo 25 mucha, for di un pueblo na frontera den ultimo siman.
Den ultimo dos luna y mey, a ataca e region mas di 3mil biaha, despues di como 8mil atake total aña pasa, gobierno regional Ucraniano ta bisa. E cantidad di atake aereo cu bom a triplica, y saboteurnan Rusio ta altamente activo, segun oficialnan.
