Cu EduTech Fund scolnan por cuminsa prepara nan proyecto y haya fondonan pa hacie posibel

Den un conferencia di prensa di prome minister Evelyn Wever-Croes ayera mainta, el a informa cu for di e dia cu nan a yega na gobernacion, innovacion semper tabata un termino hopi importante, e ta central den e maneho.

For di oficina di Futura, prome minister a indica cu innovacion no ta solamente automatisacion sino tambe ta nifica haci cosnan na un otro forma nobo, busca solucionnan na e retonan den un forma nobo segun prome minister a sigura.

Ta p’esey cu nan a organisa varios proyecto a traves di Futura cu ta e fundacion cu ta encarga cu esaki, “pakico nos ta pone tanto esfuerso pa innovacion? Principalmente pa nos muchanan pasobra hopi di nan cu awe ta bay scol basic, mañan nan lo bay traha trabaonan cu awe no ta ni existi ainda, e ora ey con bo por prepara nan lo miho posibel pa nan por eherce e trabaonan ey den e miho forma posibel, eynan innovacion ta hunga un rol hopi importante”, el a bisa.

Semper e idea tabata pa stimula pensamento innovativo y innovador den e futuro generacionnan pa asina nan por yega na alcansa nan metanan pa por haci esaki, prome minister a declara cu nan kier duna mas herment digital na e muchanan cu tecnologia nobo pa por logra esey.

Den cuater aña aki diferente proyectonan cu nan a bin haciendo conhuntamente cu Futura unda nan a enfoca riba con nan por ekipa studiante pero tambe e maestronan y mayornan mas miho posibel pa nan por yuda e hobennan cu ideanan digital necesario pa nan ta mas creativo y mas innovador den klasnan.

Pa e motibo ey nan a lansa diferente iniciativanan di innovacion den enseñansa na diferente scolnan, segun minister presidente a afirma e proyectonan mas special pa prome minister ta esun cu nan a haci na scol Cacique Aterima, e prome kleuter scol cu nan a yuda cu e hermentnan digital, igualmente na scol Cacique Macuarima, Colegio Pastoor Kranwinkel y San Francisco College.

Tambe, el a bisa cu awor e cosnan ta diferente cu e aña escolar aki y pa e motibo ey nan a anuncia e proyecto nobo cu pa e aña escolar aki nan a tuma e decision pa scolnan mes bin cu ideanan pa nan diseña y aplica nan mes e proyectonan piloto cu nan ta bin cune.

E proyecto fondo di tecnologia den educacion “EduTech Fund” ta trata di un fondo cu ta bay wordo reparti entre 4 diferente ciclo, esun prome a cuminsa ayera caba unda tur scol ta wordo invita pa den un tempo di dos luna entrega nan plan, despues un comision independiente ta bay evalua tur e peticionnan cu ta bay drenta caminda cu pa cada ciclo ta bay tin 100.000 florin disponibel cu un total di 400.000 florin pa e aña escolar aki.

Esaki ta un yamada pa cabesantenan, maestronan, alumnonan y mayornan di muchanan di scol basico y scol secundario cu tin ideanan innovativo cu nan yiu por haci na nan scol y presenta esey na e cabesante of maestro cu ta esun encarga di manda e proyecto.

Di su parti, Francois miho conoci como ‘Pancho’ Croes di Futura a bisa cu nan ta bin hayando peticion pa nan drenta den scolnan unda cu el e invita tur persona of scol interesa pa subi riba e website www.edutecharuba.org pa haya informacion y ki tipo di proyectonan por haci.

Tur scol por aplica den esaki manera el a declara y tin cierto criterionan specifico cu tin di haber como siguridad y otronan como materialnan na unda mester di un luga na scol pa por warda nan.

Di loke ta trata e ciclonnan, el a sigura cu ayera a cuminsa esun prome te 15 di november, despues ta bin e periodo di evaluacion den man di comision cu miembronan independiente di sector priva, NGO’s cu experiencia den innovacion, tecnologia y educacion lo ta esun encarga pa evalua e proyectonan y tambe si e scol ta cla pa esey, si ta realistico pa nan por logra e metanan.

Riba e website nan tin varios ehemplo di proyectonan cu nan a haci caba durante varios ciclo unda nan tambe e meta den futuro pa na Aruba siña entrega concepto di proyectonan mas defini pa motibo cu den pasado e peticionnan cu nan a haya ta cu tin hopi fondo disponibel afo pero na Aruba no semper e NGO’s of scolnan ta aplica pe.

“Esaki por ta un start di con bo por traha un project concept, nos mes a siña esey durante añanan” Croes a señala.

Asina mes, el a bisa cu nan a haya hopi peticion cu tabata alcansabel nan a purba di haci nan caba den scol of pafo di scol.

Pa finalisa, prome minister e trece dilanti cu si algun personanan tin nan idea pero nan no ta logra trece esaki dilanti den e ciclo aki, tin tres ciclo mas disponibel unda cu den e website por haya e guia suficiente “hasta si bo no tin ni un idea aworaki, bay riba e website pa wak diferente idea cu a wordo haci den diferente scolnan cu bo por bisa esaki ta algo cu a mi tambe kier haci y bo por traha riba dje”, el a bisa.