Cu e obhetivo di recauda 100 mil florin: Dia 3 di juni lo tuma luga e YMCA Telethon Fundraising Event 2019

Ayera, durante un conferencia di prensa cu Dakota YMCA Aruba a ofrece pa e medionan local, Bert de Vries – presidente di hunta di YMCA y Rhomyco Winklaar -director, a informa comunidad tocante e Fundraising Telethon Event 2019 cu lo tuma luga dia 6 di juni proximo na YMCA Dakota.

De Vries a expresa cu nan ta organisa e evento aki e dia ey cu e meta de recauda fondo pa tur e muchanan cu ta asisti na YMCA di Dakota y San Nicolas, unda nan ta haya cuido y guia di manera profesional tur dia despues di scol, cu actividadnan mientras nan ta warda riba nan mayornan, cu ta na trabou.

Asina tambe el a comenta cu ta haya e evento aki necesario pa motibo cu nan mester mantencion pa e dos luga por sigui funciona. Esaki ta un evento dirigi pa henter comunidad cu kier haci un donacion, y specialmente pa varios miembro di ‘service club’nan of celebridadnan, manera nan ta yama na Aruba, como Lions Club, Kiwanys, Rotary Club entre otro, pa asina nan asisti pa recauda fondo pa e organisacion.

Di su parti, Winklaar a informa cu e Telethon 2019 lo tuma luga dia 6 di juni venidero, for di 6or di atardi te 9or di anochi na sede di Dakota. Pa sigui mantene e prijsnan social pa comunidad, e meta ta pa por recauda 100 mil florin e aña aki.

Un di e servicionan cu YMCA ta ofrece ta trata di ‘Y’s Care AfterSchool Program’, conoci como Traimerdia, cu ta cumpli 30 aña ofreciendo servicio pa mas di 130 mucha pa dia. Tambe ta brinda pa e muchanan entre 4 pa 17 aña di edad e oportunidad pa bira un persona ehemplar den futuro, bou implementacion di norma, balor y spiritualidad den nan desaroyo.

Di loke ta trata e desafionan cu e organisacion ta presenta na e momentonan aki, Winklaar a bisa cu na San Nicolas nan tin un grupo mas grandi di mucha cu na e sede di Dakota, y nan a haya un crecemento den esey tambe. El a expresa cu nan mester tene cuenta cu mayoria di mayornan ta traha pabou di brug, y kisas nan ta haya un scarsedad di luga pa por laga nan yiunan, y ta acudi cerca YMCA.

Pa finalisa, el a manifesta cu e parti di boluntario tambe ta un di nan desafio, pa motibo cu hopi biaha nan ta yega pa un temporada so y despues nan ta bay. El a bisa cu nan mester di boluntario constantemente pa por brinda e servicio pa e muchanan.