Richard Kramers y ex-minister di Husticia, Andin Bikker kende tabata forma parti di Gabinete Wever-Croes I, a cera tres mucha menor di 12,14 y 17 aña di edad y a viola nan derecho fundamental den instalacion di Guarda Nos Costa na FOL contra tur ley y cu consulta di Voogdijraad. Segun Richard Kramers el a kita e menornan di edad nan libertad pa interes di e menor nan mes.

Secuencia di e proceso

Segun e orden hudicial (bevelschrift) di dia 22 di augustus 2020, minister di Husticia y Seguridad, Andin Bikker a duna orden pa e mama di e tres menor di edad keda den detencion na Guarda Nos Costa. E mesun dia, e mama di e muchanan a haya un meldingsplicht (met werkverbod); dia 31 di augustus 2020 pa 4:30pm nan ta bolbe detene e mama di e tres menor di edad. Pa 2 di september 2020, e mama ta presenta dilanti hues comisario M. Soffers pa determina si e detencion tabata den cuadro di ley.

Sentencia di Hues Comisario Soffers

Pa sorpresa di hues comisario, na e momento ey el a haya sa cu e tres mucha menor di edad tambe tabata den detencion hunto cu nan mama na FOL. E no tabata na haltura di esaki antes, pa motibo cu e orden di detencion cu a presenta na hues comisario tabata dirigi na e mama so, no na e muchanan. Sinembargo, na e momento ey, hues a haya sa cu e muchanan tambe tabata cerca hunto cu nan mama.

Durante e tratamento di e caso, director e tempo ey, Richard Kramers a bisa hues comisario cu e decision di bin cu e muchanan na Guarda Nos Costa tabata den consulta cu Voogdijraad pa interes di e muchanan, y segun e ex-director a señala, e muchanan no tabatin cuminda ni luga pa drumi.

Den tratamento tambe, e ex-director a purba di hustifica na hues cu “no por papia di un detencion of di privacion di libertad pasobra e muchanan por a cana libremente paden den edificio di Guarda Nos Costa na FOL.”

Na dado momento e hues comisario no por a sigui scucha e argumentonan di e ex-director di Guarda Nos Costa mas, y hues a draai y splik’e cu “na e momentonan aki cu e muchanan no por sali for di e instalacionnan di Guarda Nos Costa, legalmente nos ta papiando di privacion di libertad pa locual ta rekeri di un base legal.”

“Nu de minderjarigen GNC niet kunnen verlaten is er sprake is van vrijheidsbeneming waarvoor een wettelijke grondslag nodig is.”

Pa motibo cu ni GNC ni minister di Husticia no tabatin un base huridico y un bevel di inbewaringstelling cu cual mester a cera e muchanan na GNC, privacion di libertad di muchanan ta totalmente contra tur ley, hues comisario a duna orden pa e libertad di inmediato na e tres mucha menor di edad.

Odisea di e muchanan den GNC

Segun un fuente interno di Guarda Nos Costa, e tres menor di 12,14 y 17 aña a keda cera den cel y mester a sigui e indicacionnan manera tur preso den Guarda Nos Costa mester haci. Esaki ta implica cu e muchanan a keda cera den cel cu nan mama for di 6:00pm te cu 8:00am; entre 8:00am pa 10:00am nan por a sali un rato y despues nan ta bay cera back.

E muchanan aki a drumi riba vloer y a keda cera dos dia ilegalmente sin ningun orden di detencion ni un base legal huridico, algo cu ta contra tur derechonan fundamental, tratadonan internacional y hasta e mesun Constitucion di Aruba.

Descripcion di e institucion Voogdijraad Aruba

Como un instancia pa proteccion di mucha, Directie Voogdijraad ta cay directamente bao di Ministerio pa Husticia. Voogdijraad ta garantisa e derecho fundamental di un menor pa un desaroyo saludable y balansa y un crecemento pa bira un ser independiente. Voogdijraad tin e competencia legal, den caso cu ta necesario, pa pidi hues tuma medida di proteccion na fabor di menor.

Voogdijraad a faya pa garantisa derecho fundamental ?

E pregunta cu a keda habri con un instancia cu su obligacion ta pa garantisa derecho fundamental di menor di edad pa un desaroyo saludable ta kita 3 menor di edad di 12,14 y 17 nan libertad sin ningun base legal y totalmente contra tratado nan internacional cu Aruba ta forma parti di dje ?

Richard Kramers tabata detene hende Ilegalmente pa duna nan meldingsplicht ?

Segun por compronde di propio declaracion di Kramers ora e tabata haci un landelijke controle, nan tabata piki emigrante na mesa di restaurantnan ilegalmente y concientemente Kramers sa cu Rechter Comisaris ta bay bisa cu e detencion ta ilegal, cu e LTU no ta traha pa cosnan asina, pero ta opta pa kita nan libertad tog, core y hiba nan GNC pa traha un meldingplicht prome cu presenta nan dilanti hues comisario.

”Bijvoorbeeld bij een controle in een restaurant, die als een landelijke controle wordt beschouwd, treffen we iemand aan tafel aan die zit te eten en hij/zij wordt gecontroleerd. De RC gaat dan zeker zeggen dat het doel van de LTU niet daarvoor is. Dan zal de RC bepalen dat de staande houding onrechtmatig is. Maar de persoon is illegaal. Ik draag aan de afdeling op om een meldingsplicht document op te maken voor deze persoon. Aan de persoon wordt uitgelegd dat hij/zij niet in bewaring hoeft te blijven, maar dat hij/zij zich wel moet komen melden. Indien de persoon zich niet komt melden, wordt het beschouwd alsof hij/zij niet meewerkt aan zijn/haar terugkeer. Dan kunnen wij de persoon wel in bewaring stellen met het oog op de uitzetting.”

Pa finalisa, minister di Husticia actual Rocco Tjon y su excelencia Gobernador di Aruba Alfonso Boekhoudt ta na haltura di e situacion y e redaccion aki a haci pregunta na nan, keto bay no a ricibi contesta te ainda despues di varios luna, ni di minister Tjon ni di su excelencia Sr. Gobernador.