(AP) – E area di bebida den supermarketnan ta birando cada biaha mas similar na un botica. Tin refresconan crea cu MUSHROOM cu aparentemente ta mehora e claridad mental y juicenan ta yen di bacteria cu ta bisa di mehora e salud digestivo. Awa cu colageno ta carga e promesa di un miho cuero, y bebidanan di energia ta ofrece kima vet den e curpa.
Bon bini na e mundo di bebidanan funcional, bebidanan cu ta disena haci mas cu smaak dushi of hidrata. Loke a cuminsa den fin di aña 1980 cu bebidanan di energia yen di cafeina of vitamina manera Red Bull awo a bira un industria di biyones. Centenares di marca ta halando atencion di consumidornan cu cada biaha ingredientenan mas exotico y marketing enfoca riba bienestar.
Si bo ta sinti stress, purba un bebida cu ashwagandha, cual tin tempo caba usa den medicina herbal. Bo kier mehora bo ehercicio? Tin bebida cu ta contene chromium, un mineral cu ta mehora bo metabolismo. Bo kier un sentido di animo mas leuk sin alcohol? Varios compania ta creando bebidanan y cerbes cu no ta alcoholico cu ingredientenan manera guayusa, un blachi di mata cu ta contene cafeina y antioxidantenan.
Compania di inteligencia di consumidor NielsenIQ a conta 53,000 simbolo di UPC na Merca su categoria di ‘functional beverage’ aña pasa, incluyendo tur e diferente sabor di bebidanan pa energia, soda, awa, y te, entre otro, cu ta bendi cu e meta di mehora e salud fisico of mental.
Nutricionistanan ta bisa cu e moda general di consumidor di busca bebida mas saludabel ta uno bon, sinembargo expertonan ta bisa cu hende mester tin cautela y lesa bon e ingredientenan, specialmente si bo ta na estado, bebiendo remedi of tin otro problemanan di salud. Tambe mester evita calorianan bashi y sucu cu nan no ta bay kima. Un bebida di Monster di 16oz tin casi mesun hopi cantidad cu un Coke regular, por ehempel.
“Un hende cu ta core un marathon tin necesidadnan diferente na un persona cu ta bayendo trabao,” Martha Field, un profesor assistent den e division di ciencia di nutricion na Cornell University a comenta.
U.S Food and Drug Administration ta regula ingredientenan y ta rekeri e label di e bebida ta honesto, y Federal Trade Commission por tuma accion si un compania gana riba e label. Den ana 2013, FTC a determina cu Pom Wonderful tabata falsamente promovi como clinicamente comproba di trata, preveni of reduci e riesgo di malesa di curason of cancer di prostaat.
Creadornan di bebidanan funcional generalmente ta haci declaracionnan menos specifico y e ciencia tras di nan hopi biaha no ta concluso. SkinTe ta bisa cu e ta “sostene hidratacion di e cuero y elasticidad” cu 3,000 miligram di colageno den un bleki di 12oz. Sinembargo aña pasa, investigadonan di Harvard Medical School a bisa cu te ainda no tin evidencia solido pa sostene cu e bebidanan cu colageno ta mehora e cuero of e crecemento y huña y cabey.
Reaccionnan negativo tambe por tuma luga. Panera Bread ta enfrentando por lo menos dos demanda cu ta bisa cu su Charged Lemonade, cual ta yen di cafeina, a causa e morto di 2 persona cu problema di curason. “E ta importante pa corda cu tur cos tin e potencial di ta ambos toxico y safe, dependiendo riba e cantidad. E dosis ta crea e veneno,” Joe Zagorski, un toxicologo pa Center of Research on Ingredient and Safety na Michigan State University a splica. “Pa motibo cu ta dificil determina e cantidad exacto di cierto ingrediente den e bebidanan aki, ta miho pa tin cautela na luga di sobre consumi.”
Den algun manera, no tin nada nobo tocante ser humano buscando beneficionan agrega na nan bebidanan. Egipcionan y Romanonan tabata bebe te di manzanilla pa su efectonan percibi. Den ana 1935, un microbiologo Hapones a introduci Yakult, un bebida di lechi fermenta cu awo ta bendi rond di mundo como un manera di mehora e salud di bo digestion.
Den e mita id e ultimo siglo, bebidanan for di Ovaltine te juice di wheatgrass tabatin su momentonan elogia como suplemento nutricional. Loke ta diferente awo ta rednan social, cual ta permiti e plamamento rapido di informacion tocante ingredientenan menos familiar, Cornell’s Field a conta.
2 di e mas recien ta adaptogen, cual ta matanan cu a ser demostra di yuda e curpa responde na faitga y stress, y nootropics, cual ta mehoradornan sintetico of natural di funcionnan cognitivo manera cafeina, gingko of aminoacido.
Modanan ta subi y baha den e categoria. Merca su benta di bebidanan probiotico y prebiotico a bira mas cu tripel ana pasa, mientras bentanan den e categoria mas madura di kombucha a aumenta cu 8 porciento, segun data di Alixpartners.
“E conocemento di consumidornan pa loke ta trata e funcion di e ingredientenan a aumenta,” Sherry Frey, vice presidente di bienestar na NielsenIQ a comenta.
Pa algun, e declaracionnan di salud den e bebidanan aki ta secundario. Amy Cassels, un coach di fitness y salud di Magnolia, Texas, a bisa cu tipicamente nan ta contene ingredientenan natural, manera juice di fruta como e fuente di sucu of endulsante. E ta disfruta di Poppi, un refresco prebiotico, como un treat di un biaha pa dia.
“Ora mi bebe algo asina, mi no ta kere cu mi ta nutriendo mi salud. Pero tampoco mi ta causando daño na dje,” Cassels a splica. “E ta un treat cu no ta carga culpa den dje.”
