(AP) — Harnaaz Sandhu di India a keda corona e di 70 Miss Universo riba diadomingo, derotando alrededor di 80 concursante den un concurso cu tabata toca pa politica y e pandemia.
E anterior Miss Universo, Andrea Meza di Mexico, a corona su sucesor, un actriz di Bollywood, na e pueblo Israeli den Lama Cora di Eilat. E concurso a tuma lugar memey di anochi, concluyendo pa 5am ora local pa acomoda e transmision den primetime na Merca.
Sadhu a bisa cu e tabata sinti ‘abruma pasobra ta 21 aña desde cu India a haya un corona di Miss Universo y e ta sucediendo awo’.
E concurso a inclui desplieguenan tradicional di trahe nacional, trahe di baño y un serie di pregunta pa test habilidad di discurso publico di e participantenan. E top 10 a luci trahenan di sea oro, silver of brons. Miss Aruba, Thessaly Zimmerman, a luci un trahe briyante di color silver.
Pero e concurso tambe a hala atencion den simannan recien pa otro motibonan. Un boycott lidera pa Palestina a urgi e participantenan pa no bay e evento pa protesta e trato di e Palestinonan na man di Israel.
Na final, solamente Malaysia, un pais predominantemente musulman cu lasonan cercano cu Palestina no a manda un representante, citando situacion global di pandemia. Gobierno Sur Africano, cu tambe ta sostene fuertemente e causa Palestino, a retira sosten pa e representante di nan pais pa motibo di su participacion.
Sara Salansky, un oficial cu Ministerio di Turismo Israeli, a bisa cu a scoge e pais pa tene e certamen e aña aki pa motibo di nan programa exitoso di vacunacion.
E concurso a sufri un obstaculo na ultimo momento cu yegada di variante omicron, cu a forsa Israel pa cera su fronteranan pa turistanan stranhero fin di luna pasa. Mayoria di e participantenan di Miss Universo ya tabata na e pais prome cu e regulacionnan nobo a bin na vigor. Pero esnan cu a yega despues a ricibi permiso special, maske cu un periodo obligatorio di 72 ora den cuarentena. Durante e certamen tabata test e participantenan pa coronavirus cada 48 ora y mester a cumpli cu exigencianan estricto di bisti tapaboca. Asina mes, participante di Francia, Clemence Botino a test positivo pa Covid-19 tiki despues di su yegada na Israel. Despues di 10 dia den cuarentena, a declar’e liber di e virus y permitie pa join back e competencia.
Riba potret: Thessaly Zimmerman di Aruba ta modela su trahe color silver. Harnaaz Sandhu na momento di su coronacion como Miss Universo.
