Ayera den Parlamento di Aruba durante un reunion publico tocante cambionan den e ley pa preveni labamento di placa y financiamento pa terorismo a wordo trece dilanti cu esaki ta un proyecto cu a cuminsa basta añanan pasa cu tin como obhetivo cu Aruba tambe por yuda preveni y combati e delitonan aki.

Den e reunion aki e prome intervencion tabata di Marisol Lopez Tromp cu ta lider di fraccion di partido MAS na unda cu mirando e proposicionnan pa cambio cu ayera parlamento a trata el a papia tocante Financial Action Taskforce, na unda a wordo splica cu ta un organisacion internacional cu Aruba ta miembro di dje y cu su meta ta pa desaroya y stimula instrumentonan den caso aki pa combati labamento di placa, terorismo financiero y tambe tur loke por ta un menasa pa loke ta sistemanan internacional financiero.

Tambe el a destaca un punto cu tin relacion cu e desaroyo den politica y cu “a pesar cu gobiernonan den pasado a pone procesonan den screening, te na e momentonan aki e politica di Aruba a keda haya su mes cu situacionnan cu politiconan of ex-politiconan ta haya nan mes como sospechosonan di caso penal cu topiconan manera labamento di placa”, el a sigura.

El a puntra pa gobierno si por splica riba rekisitonan estricto pa ‘politiek prominente personen’ y ken gobierno ta defini pa esaki aparte di ministernan y parlamentarionan, pa motibo cu politiconan na Aruba no precisamente por ta riba un lista politico sino tambe no por subestima esunnan cu por ta trahando como consehero principal por ehemplo, na bureau di minister cu ta duna e minister conseho pa wak kico minister por of no por firma.

Esunnan cu ta bay carga e consecuencia di e ley aki ta menciona entre otro e parti di abogacia y accounting y cu nan tin cu haci un investigacion di clientenan, tocante esaki Lopez Tromp a puntra si e investigacion pa clientenan lo wordo haci internamente of un otro persona lo ta involucra den esaki.

Di su parti, minister demisionario di Asuntonan Economico, Cultura y Finansa Xiomara Ruiz Maduro a declara cu Aruba como un pais chikito na unda cu mayoria di productonan ta importa tur cos ta costa placa y esey ta conta tambe pa servicio financiero, caminda cu banconan grandi no ta estableci na Aruba pero si tin mester di nan pa como coresponsal pa Aruba por ta conecta internacionalmente cu e mundo financiero.

Esey ta nifica cu e isla mester tene na mes na e reglanan aki cu tin relacion cu integridad y cu ta trece costo significativo manera Maduro a anuncia, el a trece dilanti cu pa loke ta trata inversion, un di e puntonan cu inversionistanan ta mira na Aruba ta cu ta conecta financieramente hopi facil, pa motibo cu ta wordo cumpli cu cierto reglanan cu tin den mundo criminal aki.

El a declara cu esaki ta importante pa motibo cu e ta un esfuerso y cu mester percura pa cu e leynan aki keda estableci na unda cu hunto cu aprobacion di parlamento y esunnan cu ta someti na e leynan aki ta costa nan den parti di recurso humano y tambe ta costa cen, pa comunidad na fin di dia ora cu e kier bay na un luga financiero e leynan aki a amplia mas y ta bira obstaculo pa motibo cu mundo criminal tambe ta sigui su curso, ta sigui capacita su mes y busca un otro caminda.

Esnan cu ta den area di joyeria y otronan cu ta bende productonan di luho como auto tambe ta cay bao supervision manera Maduro a señala y cu politiconan tambe ta cay bao di e regimen di e leynan aki cu ta conta pa tur y no solamente pa politico mes pero tambe esunnan den su cercania y esunnan cu tin funcionnan publico.

El a splica cu den ley aki articulo 1 ta duna un definicion kende ta un Politiek Expose Personen (PEP) y cu den politica tambe tin un ‘expire date’ na unda e persona no ta keda politico pa e resto di su bida y ta p’esey cu e ley aki su aplicacion ta pa cinco aña despues cu e persona a caba cu su funcion.

Di e cambionan mes cu a keda presenta ayera segun Maduro a anuncia tin hopi cambio tecnico, tin 40 recomendacion cu Aruba ta cumpli cu casi tur di nan, por ehemplo di e recomendacion ta papia riba sancionamento di terorismo y paisnan manera Aruba cu ta ubica geograficamente dilanti un continente cu tin di haber cu crimennan di droga.

“P’esey bo tin cu tene na cuenta cu fisicamente pero tambe electronicamente bo pais tin hopi chens di wordo mal usa y p’esey ta e motibonan tambe cu bo tin mester di e leynan aki entre nan tambe e parti di terorismo” Maduro a expresa.

Den reunion tambe a wordo treci dilanti transaccionnan cu ta wordo haci y tur loke ta inusual ta wordo reporta y si acaso tin cosnan cu instituto financiero no ta reporta, tin supervision na unda cu si nan a haya un transaccion cu no a wordo reporta, e ora ey lo sigui un multa pa instituto financiero loke ta nifica un siguransa den cuadro di ley.

E mocion aki a keda unanimamente aproba y pa loke ta trata e ley mes, Miguel Mansur lider di fraccion di partido Accion a declara cu e ley aki manera a presenta no ta bay yuda e situacion precario financiero cu Aruba tin na e momentonan aki ni ta bay yuda economia di pais Aruba.

“Nos ta un barco cu ta hundiendo financieramente y si e ley aki pasa e sink ey ta bay acelera”, Mansur a sigura pa lo cual por comprende cu Accion 21 no a sostene e ley aki.

Cu e resultado di 15 voto na fabor di partido MAS, partido MEP, partido AVP y partido Raiz y un voto den contra di partido Accion 21 e ley contra labamento di placa y financiamento pa terorismo a wordo aproba pa Parlamento di Aruba.