Cu 11 voto na fabor y 9 contra: Ley di BBO na frontera a keda aproba

Diaranson den oranan di anochi, Ley di BBO na frontera a keda aproba cu 11 voto na fabor y 9 en contra. Manera ta conoci e ley di BBO na frontera inicialmente tabatin un fecha di introduccion di 1 di juli, pero mirando tur e puntonan cu a ser treci pa dilanti pa e gremio comercial, Gobierno di Aruba a extende su fecha pa dia 1 di september.

Durante e tratamento di e ley den Parlamento, Minister di Finanzas y Cultura, Xiomara Maduro a splica na Parlamento di Aruba cu gobierno a reuni cu e organisacionnan comercial cu tabatin pregunta y preocupacion pa loke ta e introduccion di e ley aki.

El a splica cu Gobierno di Aruba, DIMP y Departamento di Aduana a traha durante full luna di juni pa asina brinda e informacion necesario y calma cualkier duda cu of preocupacion cu e introduccion di e ley aki ta crea den loke ta e gremio comercial y sector priva.

Pa loke ta puntonan cu a bin pa dilanti di parti di e gremio comercial, dos punto importante ta e definicion di productonan comercial “handelsgoederen” y e proceso di restitucion di impuesto. Minister Maduro a indica cu pa loke ta e definicion di “handelsgoederen” a splica e gremio comercial y sector priva tocante e interpretacion di e palabra “handelsgoederen”. El a splica cu “handelsgoederen” ta encera tur producto cu ta wordo importa cu e meta pa wordo rebendi. El a agrega cu esaki nan ta haci’e pa mantene e simplesa den e ehecucion di e ley di BBO na frontera y e derecho di deduccion.

Pa loke ta deduccion Minister Maduro a remarca cu e BBO cu ta wordo paga na frontera di tur producto cu ta wordo rebendi ta 100% deducibel di e volumen di benta di e comerciante.

Minister Maduro a remarca cu pa loke ta e punto di deduccion pa e sector di food & beverage, mester bay regula esaki via un decreto ministerial na unda lo indica kico lo bira e derecho di deduccion teniendo na cuenta e efecto financiero den presupuesto. El a indica cu ariba e punto aki lo bin back cu un decreto ministerial di Minister di Finanzas pa trece claridad ariba e derecho di deduccion cu e sector food & beverage tin.

Pa e proceso di reduccion di impuesto y tambe deduccion di cobransa di impuesto habri, un punto cu a bin dilanti na unda comercio a indica cu e no ta husto cu nan ta haya e cobransa di BBO na frontera cu lo afecta nan fluho di cash pasobra lo mester financia esaki delanta y nan no tin derecho pa haya nan placa.

El a sigui splica cu hopi biaha e comerciantenan tin cosnan den apelacion y si e sistema di DIMP tarda, nan no kier pa e esaki aki stroba nan.

El a subraya cu e parti di verekening cu tin den e sistema di impuesto na Aruba ta forma parti di loke ta cumplimento cu belasting.

Segun e minister cobransanan di impuesto pendiente tambe mester wordo paga y ta forma parti di cualkier departamento di impuesto mundialmente. El a enfatisa cu Aruba tambe ta wordo sigui internacionalmente, ariba loke ta cumplimento di reglanan.

“Esey ta un punto cu nos no por a acomoda pa loke ta trata e peticion di comercio,” el a remarca.

Pa loke ta cumplimento, segun Minister Maduro a indica, DIMP a splica cu tin hopi negoshi, incluso e negoshinan cu ta importa producto, cu no ta pagando impuesto manera mester ta, nan no ta reporta nan declaracion di BBO y pa aña 2022 tin un suma di 6.2 miyon florin cu ainda no a wordo paga pa loke ta comerciantenan cu ta importa productonan na Aruba.

El a enfatisa cu e falta di cumplimento tin un efecto directo na e fluho di cash di Gobierno y aunke tin falta di cumplimento, no por kita e hermentnan di e sistema di impuesto internacional cu ta conta na Aruba tambe

E parti di restitucion, e mandatario a señala, cu a duna e splicacion na e stakeholders di con e sistemanan ta traha cu otro y con tur e partinan cu ta envolve restitucion ta bay automaticamente for di e sistema di DIMP.

El a agrega cu a base di e preocupacion aki, DIMP a realisa un trabao y a mira cu por ehemplo den e sector di importacion tin 200 compania cu tin un apelacion pendiente y aworaki lo bay trata esakinan cu prioridad halto pa esaki no stroba e proceso di restitucion si esaki ta e caso.

Minister Maduro a informa cu tin un ekipo nobo cu ta bay traha na DIMP pa asina atende cu e apelacionnan y na momento aki ta atendiendo cu 1200 apelacion pa luna.

Minister di Economia, Desaroyo Sostenibel y Comunicacion, Geoffrery Wever, a elabora ariba ki impacto BBO na frontera ta bay tin ariba poder di compra y con e ta afecta e cartera di e consumidornan.

El a splica cu esaki ta traduci su mes back den e concepto di inflacion. Pa 2023, Minister Wever a señala, e proyeccionnan di inflacion ta hiba na un inflacion di 4.4%. Na october 2022 ora cu a haci e proyeccionnan inicial di inflacion pa aña 2023, esaki tabata 5.4%. Aworaki e proyeccion ta ahusta na 4.4% cual ta indica cu e inflacion ta bahando y esaki ta refleha su mes tambe den e poder di compra di e consumidornan.

El a remarca cu aña 2023 ta un aña di diferente cambio drastico cuminsando cu e aumento di BBO di 6% pa 7% cu a drenta na vigor dia 1 di januari y reduccion den e tarifa di awa cu coriente desde 1 di mei 2023 cu un tarifa di 7.1% y tambe ta tuma den consideracion e impacto inflatorio di BBO na frontera. Tur esaki tin impacto riba inflacion.

“Ora cu considera tur e elementonan aki, e ta hiba na un inflacion di 4.4% den 2023 cu ta considerablemente menos cu e aña anterior,” el a subraya.

Minister Wever a splica tambe pakico a haci cambio di BTW pa BBO na frontera y con a tuma e decision pa haci e cambio aki.

El a indica cu ora cu tabata momento pa tuma decision tocante si ta bay introduci BTW di 6% y 14% of alternativanan, a realisa diferente calculacion y estudio, y un di nan tabata e estudio inflatorio.

Pa e tempo ey, el a señala, e inflacion base tabata 5.5%. A base di esaki Gobierno a realisa dos scenario y a comparti esaki cu tur stakeholders. Un scenario na unda comercio ta haci un roll back completo y un scenario unda no tin roll back y esaki a hiba na e punto final. Un inflacion di 10.7% si tin roll back completo y un inflacion di 15.3% si no tin roll back. Esey tabata dos resultadonan si a lo a introduci BTW.

“Esey a hiba na e decision cu introduccion di BTW no tabata prudente y asina a dicidi di aumenta e BBO y hunto cu esaki tambe a dicidi cu lo bin un BBO na frontera,” el a remarca.

El a detaya cu e aumento di un 1% riba BBO cu a drenta na vigor dia 1 di januari 2023 tin un consecuencia inflatorio di 1.4%. E BBO na frontera pa full un aña ta hiba na un inflacion di 1%. Hunto riba termino anual, Minister Wever a enfatisa, e aumento di BBO y introduccion di BBO na frontera ta hiba na un inflacion di 2.4%. Cual ta considerablemente mas abao compara cu e otro scenarionan.