Crystal Leito ta un hoben cu, igual cu hopi hoben den e era di tecnologia, ta hopi activo ariba rednan social. Esaki a hiba Crystal na oportunidadnan extraordinario cu a lansa su carera como un social media influencer. Crystal ta conta con el a yega na e carera, su hobbies y tambe su vision pa futuro.

Crystal a studia na International School of Aruba, despues di esey el a sigui su estudio na Flagler College, Florida unda el a studia Business Administration y Marketing y a ricibi su titulo di Bachelors cuater aña pasa. Despues di su graduacion el traha den administracion durante dos aña y aworaki e tin dos aña trahando como un freelance social media coordinator pa diferente empresa.

E ta conta cu su carera di social media influencer a cuminsa aproximadamente dos aña pasa durante e pandemia di COVID-19. Pa motibo cu tur cos a cera durante e pandemia, social media a bira algo cu a explota, y como un persona cu semper tabata hopi activo ariba rednan social, Crystal a wordo acerca pa diferente negoshi, grandi y chikito aki na Aruba pa yuda cu nan exposicion ariba rednan; y asina su caminda di social media influencer a cuminsa.

“Mi a haci diferente promocionnan. Mi a haci hasta na Hulanda, un negoshi cu un mucha muhe a caba di cuminsa y nan a contacta mi pa expone nan nomber. Dus si, mi ta haci diferente cos y e ta varia, e por ta sport, beyesa, bebida, dus e ta echt varia”, el a agrega.

Pero manera den tur otro carera, como social media influencer tambe tin hopi retonan. Un di esaki ta e cuentanan di empresanan riba rednan social cu hopi biaha ta resulta di ta falso. Crystal ta splica cu e mes a yega di pasa den esey, pero di su parti, pa evita cay den e mentiranan ey e mes ta purba di haci investigacion ariba e cuenta di e supuesto empresanan aki.

“Mi ta purba di wak bon, pasobra bo por haya un mensahe cu por ta spam, hopi biaha e ta spam. Dus mi ta echt bay wak nan pagina, mi ta wak nan interaccion. pasobra por ta nan tin hopi followers pero nan interaccion no ta cuadra cu e cantidad di followers cu nan tin riba nan pagina. Dus asina hopi biaha bo por haya sa si e cuenta ta uno di berdad of no”, el a indica.

Crystal ta un hoben cu tambe ta hopi activo cu training y ultimamente ta mas activo cu kickboxing. E ta conta cu semper el a gusta train y semper e tabata un hende activo, tabata core, e tabata bay gym y parti ey semper tabata un rutina den su bida. E ta considera su mes un ‘morning person’ y training mainta ta e manera cu e gusta cuminsa su dia.

E tin casi un aña y mey ta train kickboxing y esey a bira parti di su rutina diario. “Mi ta gusta, mi ta hay’e echt un bon ehercicio di cardio, pero tambe un stress relief workout, e ta echt all-in-one”, el a expresa.

Pa hopi e deporte di kickboxing ta uno cu ta specificamente pa hende homber so. Pa hende muhe participa den esaki e tabata, of ta ainda, wordo mira manera un taboo. Crystal semper tabatin un interes hopi grandi den kickboxing. E ta conta cu su tata ta un comentador di boxeo, su ruman homber tabata den kickboxing y karate desde cu e tabatin ocho aña, pero nunca e por a participa pasobra e ta mucha muhe y e ta un sport agresivo.

Pero aworaki na grandi, Crystal a dicidi di purba y personalmente e ta haya kickboxing un sport cu ta empodera hende muhe. “E no ta necesariamente cu bo ta agresivo, e ta echt empowering, waw mi a haci esey, mi a pusha mi limite y e ta hopi great”, el a agrega.

E ta remarca cu toch ainda e ta un taboo pa hende muhe participa den kickoboxing pasobra ainda hopi hende ta asocia kickboxing cu agresividad of cu homber so, pero pa Crystal en realidad e no ta asina. E ta enfatisa cu e ta algo pa tur hende y e ta un sport cu ta empodera hopi y cu ta duna hopi disciplina.

Pa loke ta su vision pa futuro, el a conta cu su meta principal ta pa eventualmente lansa su propio compania di social media y marketing. “Mi ta kere cu siendo echt un imagen mi mes riba social media caba mi kier echt crece den esey y eventualmente ta completamente riba mi mes cu mi compania di social media y marketing”, el a remarca.

Por ultimo, Crystal su mensahe pa e hende muhenan cu semper tabata kier realisa cualkier hobby of soño, pero a motibonan manera di taboo of cualkier otro motibo no a durf di purba: “Ami mes tabata uno pa algun tempo y mi lo bisa na esey djis kere den bo mes, esey ta algo hopi importante. Kere den bo mes pasobra bo por, y si bo kier hacie djis hacie, no worry cu locual otro hende ta pensa of bisa di loke bo hobbies of soñonan ta. Si bo ta kere den bo mes y si esey ta locual bo kier, djis bay pe”.