E “innovador” cruzada anti-corupcion na Brasil ta e riesgo di sabotahe di parti di interesnan politico atrinchera, asina e procurador Deltan Dallagnol a alerta na e corant Britanico Financial Times, segun e corant Brasileño Jornal do Brasil.
E corant Ingles a destaca cu e asina yama proyecto Lava Jato ya a realisa 110 condena, incluyendo esun di ex-presidente Lula, “e presidente mas popular di historia reciente di e pais”, ademas di e otro figuranan cu antes tabata considera inalcanzable, manera e ex-presidente di Camara di diputado Eduardo Cunha, y ex-presidente di e empresa Odebrecht, e compania mas grandi di construccion na America Latino, Marcelo Odebrecht.
“Pero, apesar di e popularidad di e investigacionnan entre e Brasileronan comun, tin un reaccion creciendo den intensidad,” Deltan Dallagnol, procurador federal na frente di e movimento anti-corupcion, a conta Financial Times.
Dallagnol a declara na e medio cu interesnan poderoso, di presidencia di Congreso, ta uni nan mes pa debilita e investigacion, o hasta pa interumpi esaki.
E caso di e senador Aécio Neves y di e parlamentarionan di partido PMDB na Rio de Janeiro a ser destaca den e corant. “Na october, senadornan a uni pa permiti pa un di nan, Aécio Neves, permanece den su cargo despues cu a hay’e den grabacion discutiendo soborno cu un empresario. Siman pasa, e cuerpo legislativo di Rio de Janeiro a revoca e decision di tribunal cu a pone su presidente den prison, y recientemente tabatin e cambio controversial di e hefe di Polis Federal,” Financial Times ta skirbi.
E corant no ta keda sin menciona e criticanan cu Dallagnol y e hues federal Sérgio Moro a ricibi, cu nan lo ta realisando investigacion, encarcelamento y condena arbitrario, basa solamente riba futilidad y conclusion propio.
