Cruz Cora ta organisando un evento pa recauda fondo cu nan lo canalisa pa prepara e generacion nobo, e hobennan cu ta aspira pa futuro bira un socorista di e organisacion aki na Aruba.
E ta un fundraising den forma di caminata cu lo tuma luga riba diadomingo 26 di juni awor. E ta un caminata di 5.5 km cu ta cuminsa pa 5’or y mey atardi saliendo for di sede di Cruz Cora mes na Dakota.
E caminata pa hoben, aunke e no ta uno exclusivamente pa hobennan sino cu adultonan tambe lo por participa den dje. E idea tras di e caminata aki ta esun di trece e hobennan di scol y organisacion hubenil hunto ya sea di scouth, deportivo, social, etc…
E hala hubenil di Cruz Cora tin proyecto henter aña y cada proyecto tin gasto envolvi den dje, entre nan transportacion, uniform, cosnan di come y bebe, etc… E grupo aki a cuminsa chikito cu 10 hoben y awor el a bira un grupo di 35 hoben. Nan ta e futuro lidernan di Cruz Cora cu nan ta preparando keto bay. Pero pa nan por sigui cu nan proyecto nan mester di fondo.
E hobennan aki ta realisa trabou boluntario cerca nos grandinan di nos cas di anciano, specialmente den cuadro di Dia di Mama y Tata. Nan ta realisa proyectonan cu tin di haber cu conservacion di nos medio ambiente. Tambe nan ta bay PAAZ unda nan ta haci donacion na nan clientenan pa fin di aña.
Nan ta formula un invitacion na pueblo di Aruba pa bin cana cu nan ya sea den grupo di famia of amigonan. Ya caba e inscripcion ta tumando luga na Ibisa te cu diabierna fei di 8’or di mainta te cu 4’or atardi. Tambe tin inscripcion na Cruz Cora mes riba dia 22, 23, 24 y 25 fei di 6’or atardi te cu 8’or anochi.
Nan ta spera cu e biaha aki nan por conta cu un grupo grandi mirando cu hopi hende ta gusta cana y nan ta contribui cu un bon causa. E contribucion ta 10 florin pa adulto y 5 florin pa hoben.
