DEN HAAG (The Daily Herald) – Cruz Cora di Hulanda ta hopi preocupa pa e situacion di crisis den cual hopi refugiado Venezolano ta haya nan mes aden na Aruba y Corsou. Cada bes mas refugiado ta bati na porta di unidad local di Cruz Cora pa pidi ayudo.

Segun The Daily Herald, Cruz Cora a bisa den un comunicado diamars cu hopi refugiado Venezolano no tin opcion pa alimenta nan mes, y hopi biaha tin necesidad urgente di medicina. Hopi di nan no tin hogar.

“Nos ta mira situacionnan hopi tristo. E personanan aki ta biba den miedo constante y insiguridad”, vocero di Cruz Cora, Belinda van der Gaag, kende actualmente ta na Aruba, a bisa.

E oficina di Nacionnan Uni pa Coordinacion di Asuntonan Humanitario (OCHA) a calcula na october aña pasa cu tin como 16,000 persona di Venezuela bibando na Aruba, y como 26,000 na Corsou, mayoria di nan ilegal. Refugiadonan nobo ta yega diariamente, y nan ta luchando pa sobrevivi. Explotacion y traficacion di hende, incluyendo prostitucion forsa, ta riesgonan grandi.

Segun Cruz Cora, un cantidad di muhenan na estado cu tin mester di atencion medico urgente a reporta na Cruz Cora na Aruba. “E muhenan no tin unda mas pa bay. Nos a prepara asistencia medico pa nan, pero tin hopi mas hende den crisis”, Van der Gaag a bisa.

Cruz Cora na Corsou y Aruba ta yuda e refugiadonan cu cuminda, un luga pa keda, y paña. E organisacion kier duna mas asistencia riba e islanan. E necesidadnan humanitario na Aruba y Corsou ta halto pa via di falta di shelter di emergencia y otro necesidadnan basico di e refugiadonan. Cruz Cora ta anticipa cu e cantidad di refugiado vulnerabel lo crece mas ainda pa motibo di e deterioro economico na Corsou.

Cruz Cora a cuminsa un recaudacion na Hulanda siman pasa. Te awo, e recaudacion a duna apenas 106,000 euro, cual no ta suficiente pa asisti hende na Venezuela y e Venezolanonan cu a huy na paisnan y islanan cercano.

Merca a entrega un peticion oficial na autoridadnan na Willemstad den weekend pa uza Corsou como un hub pa ayudo humanitario pa Venezuela. E ta concerni cuminda, awa, medicamento y otro bienes pa e Venezolanonan.

Gobierno di Corsou en principio ta dispuesto pa coopera, pero a pone un cantidad di condicion: Presidente Nicolas Maduro mester bay di acuerdo cu asistencia Mericano for di Corsou, y uzo di ekipo militar Mericano no ta permiti. Esaki ta nifica cu e Mericanonan no por uza nan propio FOL (forward operations locacion) na Hato Airport pa despega pa Venezuela.

Venezuela no a permiti cuater miembro di Parlamento Europeo den e pais durante weekend. E grupo, cu a inclui parlamentario Esther de Lange di CDA a wordo nenga acceso na aeropuerto na Caracas, y a wordo manda bek den e prome vuelo pa Madrid, Spaña.

“Esaki ta un berdadero lastima. Nos no a bay pa provoca, nos a bin pa mira con ayudo medico pa hende na Venezuela ta bayendo”, De Lange a bisa.

Minister di defensa Hulandes, Ank Bijleveld-Schouten a informa Tweede Kamer diamars cu e servicio di inteligencia militar Hulandes MIVD ta conduciendo un investigacion tocante e crisis politico y socioeconomico na Venezuela y e posibel efectonan di esaki pa Reino.

MIVD ta hibando e investigacion aki hunto cu e servicio general di inteligencia Hulandes, AIVD, Bijleveld-Schoute a bisa den un carta na parlamento tocante e plan di MIVD pa 2019. E no a duna mas detaye den su carta. E plan anual mes ta un secreto di estado, y e documento ta wordo entrega unicamente na e Comite Pa Inteligencia Y Servicionan Di Siguridad di parlamento.