Den un grupo cera di Facebook 4331 miembro di Cruz Cora Internacional ta discutiendo riba e scandalnan di sex cu a sali den publicidad recientemente.
Esta cu dunadonan di ayudo ta huur prostitutanan y organisa fiestanan di sex den areanan di calamidad, manera a pasa despues e temblor na Haiti cu trahadonan di e organisacion di ayudo Oxfam.
E fuente Hulandes NOS a publica esaki a base di un publicacion den e corant Suizo Le Temps. Boluntarionan y trahadonan di Cruz Cora Internacional ta comparti hasta experiencianan. Manera uno ta conta cu durante e 6 aña trahando na Cruz Cora Internacional (ICRC) ‘e comportacion aki tabata algo usual durante misionnan.” Hasta ta menciona cu ICRC sa di casonan pero no ta actua y hasta a duna promocion na un persona cu nan a gara.
E grupo riba e medio social tambe a traha un poll unda ta puntra e miembronan si nan ta sa di coleganan cu a haci uzo di servicionan sexual paga. Den e corant Suizo un vocero di ICRC a comenta cu nan ta na haltura di e grupo y tin atencion pa e asuntonan treci dilanti den e grupo. Y cu nan ta tuma nan hopi serio.
Cruz Cora di Hulanda a reacciona na NOS bisando cu nan ta traha independiente di e organisacion internacional ICRC. Riba nan website nan a publica 15 di februari un declaracion riba mal comportacion di dunadonan di ayudo. Den esaki Juriaan Lahr, responsabel pa manda trahadonan/boluntarionan afo, ta bisa cu den e ultimo 15 aña nan a ricibi 3 melding di Hulandes cu tabata envolvi den un scandal di sex. Tabata trata di bishita na prostituta y saca potretnan di hende muhe sunu. Nan a termina sea no extende e contractonan di tur tres. Sinembargo sr. Lahr ta bisa cu nan no ta descarta cu por tin mas Hulandes envolvi como cu nan ta traha pa e division internacional di Cruz Cora.
