Den cuadro cu asistencia na st. Maarten, Cruz Cora Aruba a laga sa cu diadomingo cu a pasa, 11 boluntario mas a bula bay pa asistencia. Esaki ta team cinco cu a bay despues di regreso di team cuater cu a bay hiba donacion pa e isla.
Desde mañan pa dilanti Cruz Cora Aruba lo stop di tuma productonan pa donacion. “Pasobra a pesar di e tres containernan cu nos a yena, nos warehouse ta totalmente yen atrobe. Pa transporta bo ta haya ayudo pero e ta hopi gasto. Pero aworaki poco poco na st. Maarten tin hopi producto cu a bin di tur caminda; Corsou, Bonaire, Hulanda etc,” Indra Anthony Pereira , hefe di operations & marketing na Cruz Cora Aruba ta bisa.
Cruz Cora Hulandes ta coordina e trabaonan na st. Maarten. Cada isla hunto cu Cruz Cora Hulandes a traha hunto pa locual tabata e ultimo accionnan aki pa yuda st. Maarten recupera despues di e tormenta. “Aworaki nos falta dos container cu nos por yena ainda cu cosnan cu nos tin. Pues nos ta stop diaranson pa cuminsa traha riba e shipment ey e ora.”
Donacionnan pa otro islanan
Cruz Cora Aruba ta manda donacionnan pa st. Maarten y depende na kico mester, ta manda pa otro islanan, entre otro Saba y st. Eustatius. Esaki ta un esfuerso di Reino; Cruz Cora Hulandes unda cu Aruba, Bonaire y Corsou ta cay bao di dje. Pa esnan cu kier haci donacionnan otro caminda cu a keda afecta di e tormenta, manera Puerto Rico, ta conseha pa bay riba www.2.pr.gov y haci un pago online directo.
“Hopi biaha hende ta yama y puntra pakico no tin donacion pa Dominica por ehempel. E netwerk di Cruz Cora ta mundial anto cada region ta cay pa su region. Si tin un temblor na Chile of Colombia, con lamentabel cu e por ta, Cruz Cora di Las Americas ta esunnan cu ta bay prome, y depende tambe riba grandura di un pais. Den caso di Dominica, berdad Hulanda ta yudando nan pero Cruz Cora Aruba no. Nos ta chikito pues mester percura pa bo capacidad keda”, sra. Pereira ta splica nos.
E ta sigui bisa cu bo personal semper ta keda importante pa tene cuenta cu ne. Pues pa nan no bay manca anto mañan algo pasa akinan cu nos no tin hende ni material. “Nos tambe ta haya jammer pa Dominica pero tin otro paisnan cu ta yudando Dominica. Pues nos ta keda trankilo cu tur hende tin e yudansa cu nan mester. Nos tin cu caba cu e trabao cu nos a cuminsa y cab’e netjes y bon.”
Manera Bon Dia Aruba a publica siman pasa, por sigui haci donacion bancario riba cuentanan di banco di emergencia special pa yuda cu tur trabao y material na st. Maarten. Aruba Bank #038.401.0390 y Caribbean Mercantile Bank #641.733.07.
