Crusada na area di Palm Beach a bin registrando basta accidente den ultimo lunanan y a bira un crusada peligroso. Na e momentonan aki, segun director interino di DOW a sigura, nan ta analisando e solucion na unda a keda conoci cu ta bay construi un rotonde.
Manera ta conoci, for di basta tempo – casi tres aña aproximadamente – e luz trafico di e area aki ta presenta problemanan tecnico, na unda cu accidentenan ta tuma luga keto bay, a pesar cu DOW a pone borchinan y luz pa precaucion. Pero e solucion aki te ainda no ta suficiente.
Durante un conferencia di prensa siman pasa di DOW, Bon Dia Aruba a puntra con a para cu e trabao di reparacion di e luz di trafico na e crusada aki. Director interino di DOW, Jossy Kock a informa cu nan ta wardando fondonan pa por traha e rotonde y alabes nan ta wak un otro opcion, cu por ta un solucion temporario, pa di e manera ey por evita mas accidente.
“Aworaki nos ta bezig cu un solucion temporal y manera cu esey lo keda cla, e ora nos ta bay implement’e”, Kock a expresa.
Di loke ta trata e solucion temporal, Kock no a duna hopi detaye. Pero si a afirma cu ta keda na parti di e departamento pa presenta un solucion pa asina evita cu mas accidente lo sigui tuma luga tur dia na e crusada aki.
