Fuentenan den industria di crucero ayera tardi a publica informacion cu ayera mainta trempan, e tripulacion di e Mardi Gras, un crucero di Carnival Cruise Line, a responde na un yamado di wardacosta Mericano pa ayudo pa un barco di bela riba cual a tuma lugar un emergencia medico.
E pareha abordo di e barco tabata pega como 20 miya nautico leu di Castle Island, cual ta parti di Bahamas.
E Mardi Gras, cu a haci su debut na 2021, tabata menos cu nuebe miya leu for di e barco di bela na momento cu wardacosta Mericano a tuma contacto cu e barco pa duna asistencia, segun un declaracion di Carnival Cruise Line.
E barco inmediatamente a cambia su ruta y a pasa como dos ora buscando e barco di bela, prome cu a logra ubica esaki. Na e momento ey a baha un barco salbabida for di e Mardi Gras pa e boto di bela den problema, pa yuda asistencia na e pareha, kende ambos ta ciudadano Mericano.
Unabes abordo di e Mardi Gras, e homber kende a keda rescate for di e barco di bela a ser admiti na e centro medico di e crucero pa ricibi tratamento medico. Actualmente e ta ricibiendo cuido for di e team medico abordo di e crucero. No a revela detayenan adicional tocante e condicion di e pareha.
Segun e comunicado di Carnival Cruise Lines, e Mardi Gras tabata nabegando riba un biahe di ocho dia cu a sali for di Port Canaveral na Florida, na momento cu a ricibi e solicitud pa duna sosten di rescate. E crucero tabata na caminda pa su prome port call na Aruba.
Awo e barco ta continuando su caminda cu su itinerario plania, y ta programa pa yega nos isla awe diamars.
