Cu referencia na e titulo di e famoso obra di Garcia Marquez, por bisa cu loke ta tumando lugar awor cu e ‘handel en wandel’ di e mandatario responsable pa Labor y Dimas, tabata un desastre anticipa pa hopi persona. E gobernante, for di su anterior periodo di gobernacion, ta conoci como e tipo cu ora bis’e cu algo no por, su unico pregunta ta “unda esey ta skirbi?”. Y como cu ningun hende ta sigui insisti desde e punto ey, e ta dal bay cu maneho imposible, incorecto y absolutamente inaceptable. Pero, mester a bin un huez pa pone un paro na e abuso ministerial.
E caso aki, di suspension na man di huez di e decretonan ministerial den cual e mandatario a pone director di e departamento un banda, ta yama e siguiente interogante, y esey ta si e ministro lo bay actua segun veredicto di huez, y lo pone e directora na cabez di e departamento, manera ley ta prescribi. Nos no a tende nada al respecto ainda, pero mirando cu ta dificil pa kere cu de repente iluminacion celestial a penetra cerca e mandatario, mas bien na e momento aki lo ta buscando manera pa ‘work around’ e asunto, pa mantene e structura di dirigencia crea, a traves di un management team y un subalterno di e directora, cu via decreto a haya mas poder cu su hefe. Esaki tambe ta un punto critica pa e huez, cu de hecho no a laga ningun piedra riba otro di e defensa di e ministro den corte.
Lo por scucha e critica cu huez ta duna demasiado peso na e reemplazo di un director pa un management team, ya cu den pasado na varios oportunidad gobierno(nan), di diferente color partidario, a haci uso di e instrumento aki. Esey ta berdad pero tin un diferencia cu e casonan anterior. Uno ta cu tabata trata di sustitucion completo di un director, cu no tabata presente mas den e departamento, por ehemplo a traves di un suspension. Cu e ultimo acto ey tabata corecto si of no, esey tabata debatible y varios caso a bay corte tambe, desafiando e decision di e suspension. Den e caso actual e mandatario, cu o sin asistencia huridico di su team familiar, a scoge pa e modalidad nobo aki, di pone un director un banda y degrada e persona na un nivel menor di funcionamento, cu no ta cuadra cu su nombramento.
Huez a critica tambe e hecho cu e ministro, y su conseheronan, a bay asina leu pa hinca e cambionan proponi den un disposicion ministerial (ministeriële beschikking) y cu esey tabata pretende cu por a deshaci di un decreto nacional (landsbesluit), cu ta di un orden huridico mas halto. Nan no tabata sa esey? Probablemente si, pero ta asina arogancia di poder ta funciona, cu no ta tuma e cosnan aki na serio. Si nan no tabata sa, anto nos mester duda, no pa promer biaha, den e capacidad profesional di e ministro y su conseheronan. Nan por wel di keda pretende cu ta nan mes ta toca y balia, pero ta nos cara como pais nan ta pone na berguenza cu e tipo di acto aki.
Pregunta grandi ta pa gobierno den su totalidad y tambe pa e partido mayoritario den e gabinete, kico lo bay sucede awor. Despues di tanto alabanza cu e palabranan ‘integridad’ y ‘transparencia’, ta interesante pa mira kico ta haci. Laga nos bisa di antemano cu, mirando e trayectoria di e partido mayoritario den e ultimo casi cinco aña, nos no ta anticipa ningun accion, y di mes e segundo team den parlamento lo haya orden pa no mishi cu e asunto. Mas probable ta cu e ministro lo busca un pretexto fofo pa no cumpli cu e veredicto di huez y lo laga tur cos manera cu e ta awor.
Mester bisa si, pa tur claridad, cu e forma di traha aki, unda e ministro ta otorga poder di firma na otro empleado cu no ta e director, ta data caba di e gobierno anterior 2009 – 2017. E famoso ‘bode’ cu a bira director adjunto no a keda nombra durante e coalicion desde 2017, sino pa e ex-ministro actualmente den corte pa corupcion. Hasta su nombramento a keda confirma via decision di conseho di ministro di e gobierno democristian e tempo ey. Unico cos ta cu den ultimo cinco aña no a haci nada pa coregi e situacion idiota ey, cu ta keda un bofta den cara di tur ambtenaar cu a sacrifica pa yega na un estudio drechi, pa mira despues con interes politico ta tuma tur hende haci.
Ora contempla casonan manera esun aki, y pa por comprende nan alcance y consecuencia, mester bisa cu e caso di e directora riba su mes ta solamente un di e hecho y incidentenan cu tabata y ta indica un situacion di pudricion interno, cu no ta bay drecha simplemente cu restauracion di e directora den su posicion, aunke esey naturalmente lo mester ta e promer paso. E mandatario por sorprende henter comunidad iniciando otro trayectoria cu no ta esun desastroso pa cual e ta conoci. Sin embargo, ta dificil imagina cu e ministro cu a duna e palabra nepotismo mas contenido cu cualkier otro, ta bay cambia di rumbo. Basta nos Promer Ministro no molestia mas cu su sermonnan encuanto bon gobernacion, pasobra esey no tin ningun contenido mas.
