Un crocodil a ataca y lastra un mucha di cuatro aña di edad bay cu ne, cu dia prome di aña tabata di paseo cu su famia na playa La Blanca, na municipio di Pinotepa Nacional, den e estado Mexicano Oaxaca.
E famia di e menor, ta origianlmente di estado Guerrero, a bay Pinotepa Nacional pa celebra Aña Nobo hunto cu nan parientenan. “Na un momento, e mucha lo a acerca e lagun y no tabata acompaña pa un adulto, y aki e animal a lastr’e bay cu ne pa fondo di awa,” e oficina di comunicacion social di e Coordinacion Estatal di Proteccion Civil di Oaxaca (Cepco) a comunica na Univision Noticias.
“Te na e momento aki nos no a topa cu e curpa di e menor; ta mantene e status di desapareci y nos ta sigui e protocol di buskeda na e luga, di parti di Proteccion Civil, Polis Municipal y e familiarnan,” e dependencia a informa.
“E familiarnan ta den estado di shock, nan ta sigui busca pasobra nan no ta perde speransa, sinembargo, nan ta consciente di loke a pasa, pasobra un di nan a mira cu e animal a lastra e mucha bay cu ne”, Cepco a agrega.
Proteccion Civil a detaya cu den e ultimo 12 luna a presenta cuatro atake similar den e zona. Ademas tabatin varios caso di captura di crocodil desde 2015. Apenas na juli pasa autoridadnan di Oaxaca a gara un crocodil den e SPA turistico Puerto Escondido.
Den un entrevista cu e cadena Televisa, Jesús García Grajales, investigado di Universidad del Mar di Puerto Escondido, a sigura cu e crocodilnan ta bayendo den direccion di e SPAnan di e costa di Oaxaca frecuenta pa turista, y cu esaki por ta consecuencia di cu nan ta buscando un ambiente nobo pa nan keda.
