(Infobae). – E crisis causa pa e desaparicion di e submarino ARA San Juan a cuminsa riba di 14 di november. E ultimo comunicacion cu e barco di e autoridadnan na tera tabata riba mainta di diarason 15, pero diahuebs dia 16 a yega na oido di e hefe di armada Marcelo Srur. Gobierno a haya sa e anochi ey, ora cu el a sali  publica pa e noticiero Infobae. Ainda despues cu a haya sa di un explosion y cu e operativo di rescate na marcha, tabata sigui oculta e secuencia di suceso cu a hiba na e tragedia cu e 44 tripulantenan di e submarino.

E prome biaha cu autoridadnan na tera di Armada Argentino a tuma nota cu e submarino tabata sufriendo daño serio tabata diamars cerca di mey anochi. Den e comunicacion ey, e capitan di ARA San Juan, Pedro Fernández, a informa e base di Mar del Plata –di unda el a sali dos siman prome, cu e tabatin un “cortocircuito den e bateria 3″ di e sala di bateria na parti dilanti, pasobra awa tabata drenta via e snorkel.

Den e prome minuutnan di diarason 15, e capitan a avisa e base cu e inconveniente tabata soluciona. Sin embargo, algun ora despues, el a bolbe yama pa bisa cu e tabatin un problema cu e baterianan den parti dilanti. Atrobe, den marduga el a bolbe informa cu a resolve e problema.

Cerca di seis or di mainta, mediante e telefon satelital Iridium,  ARA San Juan a pidi un cambio di rumbo. Pa 7.30 tabatin e ultimo comunicacion di e embarcacion cu tera.

Pa realisa comunicacion, e submarino mester bin halto te na nivel di snorkel. Sin embargo, como cu e awa di Atlantico tabata den condicion di “categoria 5/6” loke ta implica e existencia di ola di entre 6 y 8 metro, cada vez cu e sali e tabata keda golpea pa e olanan, pa cual e tabata obliga pa bay abao, perdiendo e capacidad di propulsion riba diesel y cu mita di su baterianan inutilisa.

Despues di e ultimo contacto,  e cupula di Armada a intenta comunica via satelite, pero sin logra.

Na momento cu ARA San Juan a notifica di dificultad e tabata na un distancia den linea recta di menos di 300 kilometro di Golfo San Jorge. Si e lo a haya e orden di bay aya, cu e velocidad cu cual e tabata  nabega di entre 15 pa 20 kilometro pa ora, ta kere cu e lo por a yega tera. Sin embargo, a ricibi orden di bay direccion pa Mar del Plata, cu ta na un distancia mucho mas grandi.

Segun e informacion cu a haya di e Organisacion di e Tratado di Prohibicion Completo di Ensayo Nuclear, tres ora despues di e ultimo comunicacion un explosion a tuma lugar den e submarino.

Esnan cu a ricibi na tera e recadonan manda pa e submarino no a pensa cu su situacion tabata asina grave. Pesey, nan a tarda pa informa e hefe di Armada, almirante Marcelo Srur, cu tabata na Montevideo ricibiendo un condecoracion pa e 200 aña di e creacion di e Marina Uruguayo. Srur a haya sa di e falta di comunicacion cu e barco diahuebs den oranan di atardi. Oranan despues, ora ya ta bira nochi, e ministro Oscar Aguad a lesa den Infobae cu e barco tabata perdi den Atlantico Sur.

Cu e informacion aki den su poder, gobierno ta investigando e accionnan di e top di Armada, cu por haya cambio pareu cu caba di supera e crisis. A haya noticia ayera cu en efecto Armada a acepta pedido di retiro entrega tres dia prome, di contraalmirante Gabriel González, cu tabatin e cargo di comandante di e Area Naval Atlantico, bao di cual e base di Mar del Plata ta pertenece.

Tur e conversacionnan entre e nave y e base ta graba, y tur e mensahenan mester ta archiva, pa cual gobierno ta spera di por accede e material clave aki pa cuminsa di distingui responsabilidadnan dentro di Armada.