Aruba – y Corsou y Sint Maarten – no ta haciendo suficiente inversion, segun Secretario di Estado pa Relacionnan di Reino, Alexandra van Huffelen, a indica den su carta na Tweede Kamer den e rapport semi-anual mas recien di Colegio di Supervision Financiero.
Manera Van Huffelen ta indica den e carta, e Colegio di Supervision Financiero pa Aruba (CAft), e Colegio di Supervision Financiero pa Bonaire, Sint Eustatius y Saba (Cft BES) y e Colegio di Supervision Financiero pa Corsou y Sint Maarten (Cft) ta entrega un rapport por escrito di nan actividadnan y puntonan principal di conseho cada seis luna. Hunto cu su carta, Van Huffelen ta entrega e rapport cubriendo e periodo di januari te juni 2023. E rapport a keda aproba den Conseho di Minister di Reino dia 27 di october ultimo.
Van Huffelen ta indica cu e rapport ta duna un bista riba e situacion financiero y desaroyonan di e paisnan y entidadnan publico dentro di Reino Hulandes. Ta importante pa colectivamente adresa e reto- y oportunidadnan presenta den e rapport.
Aruba
Aruba, segun CAft, ta mustra desaroyo positivo manera surplus financiero y entrega di presupuesto na tempo. Sinembargo, e calidad di informacion di responsabilidad ta keda un area di preocupacion. Medidanan structural ta necesario, specialmente pa controla costo di cuido di salud.
Corsou y Sint Maarten
Maske presupuesto di Corsou ta mustra di ta balansa te cu 2026, Cft ta conseha un maneho mas nivela, specialmente pa loke ta calculacion di entrada di impuesto y riesgo di presupuesto. E pais a tuma stapnan positivo den colecta di impuesto, pero tin preocupacion tocante e impacto di un poblacion reduciendo y embeheciendo riba entrada di impuesto den futuro.
Cft ta duna feedback riba e presupuesto di Sint Maarten pa aña 2023. E recomendacionnan ta enfoca riba inclusion di surplus den e servicio regular cuminsando na 2024 y implementacion di mas reforma pa sigura e sostenibilidad financiero di fondonan di cuido di salud.
Bonaire, Sint Eustatius y Saba
Den prome mita di 2023, Bonaire a continua mehorando maneho financiero, incluyendo auditorianan interino. Cft BES ta enfatisa e necesidad pa Bonaire crea un presupuesto realistico y balansa. Discrepancianan entre e calculacion y e entrada y gastonan real ta crea un riesgo pa cu efectividad di e presupuesto como instrumento di control. Adicionalmente, tin preocupacion tocante provision di informacion na Conseho di e Isla y Cft BES.
Pa cu Sint Eustatius, cu implementacion di Articulo15 di e Ley di Recuperacion di Entidadnan Legal dia 20 di juni, e Conseho di Isla a recupera podernan di presupuesto. For di e fecha aki, e Regulacionnan Financiero pa Cuerponan Publico di Bonaire, Sint Eustatius y Saba (FinBES) ta aplicable un biaha mas, y Cft BES a reanuda completamente su debernan di consehero estatutario. Cft BES ta resalta e importancia di aplica e FinBES corectamente. Tambe ta enfatisa e necesidad di un presupuesto actualisa y ta conseha Sint Eustatius pa ahusta e presupuesto rapidamente si e circunstancianan ta rekeri esaki.
Saba ta demostra resultadonan financiero positivo y a ricibi un declaracion di aprobacion di auditoria pa su rapport anual. Adicionalmente, Saba a actua riba e recomendacionnan di Cft BES y a mehora mas ainda su informacion di responsabilidad. Mantene e calidad di maneho financiero ta keda un prioridad. Den prome mita di 2023, Saba a dedica atencion considerable na reclutamento y training di personal (nobo.)
Inversion
Pa loke ta trata inversion, e Colegionan ta referi na un rapport di IMF di aña pasa, cu ta indica cu nivelnan di inversion publico na Corsou y Sint Maarten ta relativamente abao compara cu region Caribe. CAft ta nota cu mesun cos ta conta pa Aruba. Ta un area di preocupacion pa Aruba, Corsou y Sint Maarten pa desaroya programanan concreto di inversion y inclui esakinan den nan presupuesto multianual.
Concluyendo, Van Huffelen ta indica cu e rapport semi-anual ta revela varios stap positivo tuma den area di maneho financiero y politicanan dentro di e paisnan y cuerponan publico di Reino. Sinembargo, tin varios area ainda unda ta rekeri compromiso y reforma continuo pa sigura sostenibilidad financiero. Ta crucial pa e temanan aki keda haya atencion den discusion y formulacion di politica den futuro.
