Critica pa violacion di reglanan di Covid-19 durante campaña

Tiki mas cu un siman atras, partidonan politico cu kier participa den eleccion dia 25 di juni proximo a presenta na Censo pa asina presenta nan lista di candidato. Riba e ocasion aki a nota presencia di polis, cu tabata na e sitio pa enforsa cumplimento di medidanan di Covid-19 y tambe mantene orden en general. Sinembargo, e prestacion di polis a genera algun critica.

Segun un relato di periodista Sharina Henriquez pa e noticiero online Ret Karibense, durante dia 7 di mei ultimo, e partidonan MEP y AVP a viola reglanan di corona durante entrega di lista. Sinembargo, e ta critica cu mayoria di agente di polis tabata para na banda sin haci nada, un situacion cu keto bay ta continua mientras e partidonan ta continua campañando.

Maske Conseho Electoral y Crisis Team – cu ta inclui Departamento di Salubridad Publico DVG y polis – na mas cu un ocasion a adverti partidonan politico y nan siguidonan pa no aglomera den parada pa entrega e lista, toch por a nota cu AVP a yega stadhuis cu un parada. E instruccion tabata pa cada partido yega solamente cu dos representante. Sinembargo, AVP a presenta cu tur candidato di eleccion y un grupo grandi di sostenedor, y nan tur a marcha bay stadhuis. Na e momento ey, polis a kibra e parada y a forma un cordon pa impedi paso di persona. Esaki a proba di ta efectivo, pero e sostenedornan a simplemente keda warda den aglomeracion pa regreso di lider di e partido, Mike Eman.

“Ta un situacion masha complica. Nos ta traha den un cultura caminda nos ta expresa nos emocionnan cerca nos preferencia politico. Un partido grandi tin mas dificultad cu esaki cu uno chikito. Pasobra si bo inicia algo mes, masha lihe bo ta trece masha hopi hende riba pia”, segun Eman, kende a bisa cu si su partido haya un multa, e lo paga esaki y e ta pidi disculpa.

Sinembargo, Henriquez den su relato ta cuestiona e hecho cu hopi biaha den temporada di eleccion ta viola reglanan di pandemia, a pesar cu tanto gabinete demisionario como e partidonan a insisti y priminti cu kier evita un situacion manera a sucede na Corsou, unda actividadnan di campaña y eleccion a resulta den e brote di coronavirus di mas grandi na e isla desde comienso di e pandemia.

Partido MEP tampoco ta keda atras. Prome minister demisionario, Evelyn Wever-Croes, kende como lider di MEP tambe a yega pa entrega lista, a haci un apelacion pa hende ta cauteloso. Sinembargo, e tambe a participa den un gira di e districtonan cu ta representa e candidatonan pa eleccion. E actividad di bishita aki tambe por resulta den aglomeracion di sostenedornan cu ta bin hunto. Dia di entrega di lista, Ret Karibense a nota un grupo di sostenedornan para bao palo, loke segun reglanan di pandemia no ta permiti, pero polis a laga nan trankilo.

“Bo tin un punto ey y mi ta yama mi partidarionan pero tambe sobra di pueblo: laga nos sigui paga tino. For di maart aña pasa nos mester a entrega asina tanto. Awo nos ta asina leu pero nos no por perde esaki den un frega di wowo si nos no tene nos na e reglanan”, Wever-Croes a bisa, contestando pregunta di Ret Karibense pakico MEP no a tene nan mes na reglanan di prevencion pa Covid-19.

Di su banda, vocero di polis, Lito Lacle a bisa Ret Karibense cu entrega di lista a bay bon. “Nos a kibra e parada di AVP. Si, tabatin aglomeracion, si bo sigui e letra di ley, tres hende of mas hunto ta castigabel. Pero nos tin autorisacion discrecionario pa impone sancion of no. Den e caso aki nos a scoge pa palabra cu e personanan di contacto di e partidonan cu a entrega e listanan, duna entrevista na prensa y bay mesora. Pa nos, esey tabata mas importante.”

Den otro palabra, Lacle a indica cu cuerpo policial ainda mester evalua si lo actua mas severo contra violacion di e reglanan, specialmente pa AVP y MEP cu structuralmente no ta tene nan mes na regla. “Si ta necesario, nos lo tene deliberacion interno. Nos mester di e sosten di Ministerio Publico (OM). Por ehempel, nos por duna boet pero ainda nos mester di sosten di OM cu ta persigui tambe. Asina nos ta ripara cu tin sosten nos lo actua.” Pero asina mes, OM a indica anteriormente cu ta keda na polis pa mantene. Contestando riba esaki, Lacle a bisa Ret Karibense: “Ta nos lidernan na polis mester bay sinta cu nan. Si eyriba nan ta tuma e decision, nos lo ehecut’e.”

Mientras tanto, campaña politico ta continua na caminda pa eleccion dia 25 di juni proximo cu varios actividad. Ayera a nota cu partido AVP tabatin un actividad di sopi y sticker na cas di partido, mientras partido MEP tabata pone bandera y haci bishita na Catiri.