Un compania basa na Texas ta enfrentando critica despues di a duna un cerbes nomber di e sitio di testnan nuclear, cu a resulta den contaminacion di un cadena di isla den Pacifico.
Manhattan Project Beer Company ta bou escrutinio di e habitantenan di Marshall Islands, kende a ser exponi na nivelnan halto di radiacion pa investigacion cientifico di gobierno Mericano for di 1946 te cu 1958, segun The Pacific Daily News a reporta diahuebs.
Gobierno y residentenan di e Republica di Marshall Islands a expresa obhecion na e cerbes di e compania yama Bikini Atoll, un area di e cadena di isla cu ta permanece inhabitabel. E isleñonan a bisa cu e nomber ta insensitivo pa cu personanan cu ainda ta enfrentando e impactonan di radiacion decadanan despues.
E compania tin algun cerbes cu nombernan nuclear, incluyendo Half-life, Plutonium-239, Particles Collide, y 10 Nanoseconds.
“Nos cerbes Bikini Atoll no a ser crea pa burla of trivialisa e test nuclear cu a tuma luga den Marshall Islands”, e compania a bisa den un post riba rednan social. E compania ta ‘creando consciencia di e impactonan y implicacionnan amplio’ di programanan Mericano di investigacion nuclear, segun e declaracion.
Website di e compania no ta menciona test nuclear den un descripcion di e cerbes Bikini Atoll. Despues di locual a describi como ‘acoso significante y menasa di morto’, e compania a bisa cu no lo tuma mas accion ni duna mas declaracion.
Secretario di Salud y Servicio Humano di Marshall Islands, Jack Niedenthal a skirbi un carta na co- fundado di Manhattan Project Beer, Misty Sanford, diahuebs bisando cu e mester considera e sufrimento causa pa e testnan nuclear.
“Na final bo producto ta haci pret di un situacion horrifico aki na Marshall Islands – un situacion cu mi ta priminti bo ainda ta tumando luga – pa traha placa pa bo compania”, Niedenthal a skirbi. “Esaki ta inaceptabel pa nos.”
