Ciudadanonan a critica lider di Hong Kong Carrie Lam durante e Town Hall Meeting cu el a organisa, pa no duna oido na nan protesta despues di demostracion constante pa via di legislacion di extradicion cu kier a introduci den e teritorio Chines.
Protestante ta nenga di stop cu demostracion te ora cu introduci reforma democratico pa eleccion directo unda ciudadanonan por scoge lidernan di e ciudad y pa responsabilisa Polis. Durante e sesion, Polis tabata bon ekipa na Queen Elizabeth Stadium na Wan Chai area. Autoridad a pone mashin di x-ray y detector di metal pa sigura cu participante no drenta cu material cu por haci daño.
Lam a expresa cu e dialogo lo trece cambio pa un miho Hong Kong. E critica cu hopi ciudadano tin contra e prome dialogo despues di lunanan di protesta ta yama e dialogo un show politico pa calma protesta prome cu yega celebracion di dia nacional di China riba 1 di october.
“Esaki no ta un PR Show, e ta pa trece un cambio”, Lam a bisa. Tambe cu dialogo ta identifica problema social cu ta contribui na protestanan cu ya ta bayendo pa nan di 4 luna. Den ultimo siman e protestanan a bira mas violento. Mas di 1.500 persona incluyendo mucha di 12 aña di edad a bay den detencion.
Mayoria persona cu ta protesta ta bisa cu dialogo no ta nifica nada si gobierno ta nenga acepta nan demanda. “Pa Hong Kong e ta un joke. Si Lam kier comunica cu su pueblo, locual e tin cu haci ta habri su porta, nos ta pafo mes”, Bonnie Leung di Civil Human Rights Front a bisa.
China ta acusa Merca y otro pais cu poder di a maniobra e manifestacionnan. Vocero di Ministerio di Exterior, Geng Shuang, a avisa Merca su Congreso pa stop e proyecto di ley cu ta propone sancion economico contra trahado di China y Hong Kong cu ta suprimi democracia na Hong Kong.
Comite di Asunto di Exterior di Camara di Representante y Senado a aproba e ley di derecho humano na Hong Kong, preparando e scenario pa voto di ambos camara. Geng a bisa den un conferencia na Beijing cu esaki ta un intento pa respalda forsa radical di Hong Kong, acusando Washington di purba ‘desordena Hong Kong y contene desaroyo di China’. “Nos lo lucha cu forsa contra cualkier intento di Merca pa daña interes di China”, Geng a bisa.
